'തലചായ്ക്കാനൊരിടം': അടൂരിൽ ഗുഡ്ന്യൂസ് ഭവനപദ്ധതി പുരോഗമിക്കുന്നു
ഭവനരഹിതരായ 21 കുടുംബങ്ങൾക്ക് ആശ്വാസമാകും
അടൂർ: തലചായ്ക്കാൻ സ്വന്തമായി ഒരിടം ഇല്ലാത്ത ചിലർക്കെങ്കിലും അവരുടെ സ്വപ്നം സാക്ഷാത്കരിക്കാൻ സഹായിക്കുന്ന പദ്ധതിയാണ് അടൂർ ആനന്ദപ്പള്ളിയിലെ ഗുഡ്ന്യൂസ് ഭവന നിർമ്മാണം. അർഹരായ 21 കുടുംബങ്ങളുടെ ജീവിതാഭിലാഷമാണ് പ്രസ്തുത പദ്ധതിയിലൂടെ പൂവണിയുക. ഗുഡ്ന്യൂസ് ചാരിറ്റബിൾ സൊസൈറ്റി നേതൃത്വം നൽകുന്ന പദ്ധതിയിൽ നിലവിൽ മൂന്നു വീടുകളുടെ പണികളാണ് പുരോഗമിക്കുന്നത്. ബാക്കി പണികൾ ദ്രുതഗതിയിൽ നടക്കുന്നതായും ശേഷിക്കുന്ന ഭവനങ്ങളുടെ പണികൾ ഉടനെ തന്നെ ആരംഭിക്കുമെന്നും ഗുഡ്ന്യൂസ് ചാരിറ്റബിൾ സൊസൈറ്റി പ്രസിഡണ്ട് കുര്യൻ മാത്യു പറഞ്ഞു. കൂടാതെ പൂർത്തീകരിക്കുന്ന 3 ഭവനങ്ങളുടെ താക്കോൽ ദാനം ജൂലൈ മാസം നല്കാൻ കഴിയുമെന്നും അദ്ദേഹം പറഞ്ഞു.
ഭവന നിർമാണത്തിന് സാമ്പത്തികമായി ഇതുവരെ സഹായിച്ചവരെ നന്ദിയോടെ ഓർക്കുന്നുവെന്നും സഹായിക്കുന്നവരുടെ വിശദാംശങ്ങൾ ഗുഡ്ന്യൂസിൽ പ്രസിദ്ധീകരിക്കുമെന്നും അദ്ദേഹം പറഞ്ഞു.
അടൂർ ആനന്ദപള്ളിയ്ക്ക് സമീപം ചരുവിളയിൽ ജോർജ് വർഗീസ് ഗുഡ്ന്യൂസിനു ദാനമായി നൽകിയ 90 സെന്റ് സ്ഥലത്താണ് അർഹരായ 21 കുടുംബങ്ങൾക്ക് ഭവനങ്ങൾ പണിതു നൽകുന്നത്.
ഭവന രഹിതരായ ഒട്ടനവധി വ്യക്തികളുടെ അപേക്ഷകളാണ് ഗുഡ്ന്യൂസ് ചാരിറ്റബിൾ ഓഫീസിലേയ്ക്ക് വരുന്നത്. ഇവരുടെയെല്ലാം സ്വന്തമായി ഒരു വീട് എന്ന സ്വപ്നം പൂവണിയിക്കുവാൻ സന്മനസ്സുള്ളവരുടെ സഹായ സഹകരണങ്ങൾ ആവശ്യമാണ്. താങ്കൾ നൽകുന്ന സഹായം എത്രയായാലും ഞങ്ങൾക്ക് വിലപ്പെട്ടതാണ്. പദ്ധതിയുടെ ഭാഗമാകാൻ ഓരോരുത്തരുടെയും സഹകരണം അപേക്ഷിക്കുന്നു.
നാലു പതിറ്റാണ്ടോളമായി ജീവകാരുണ്യ പ്രവർത്തന മേഖലകളിൽ ശ്രദ്ധേയമായ പ്രവർത്തനങ്ങൾ കാഴ്ചവെക്കുന്ന ഗുഡ്ന്യൂസ് ചാരിറ്റബിൾ സൊസൈറ്റി നാളിതുവരെ 2500 ഓളം വീടുകൾ പണിതു നൽകിയിട്ടുണ്ട്.
പദ്ധതിയെക്കുറിച്ച് കൂടുതൽ അറിയുവാൻ ബന്ധപെടുക: കുര്യൻ മാത്യു (പ്രസിഡണ്ട്): +966 54 581 9929, സന്ദീപ് വിളമ്പുകണ്ടം (എക്സിക്യൂട്ടീവ് സെക്രട്ടറി): +91 9961940485
കുര്യൻ മാത്യു - പാസ്റ്റർ ജെയിംസ് ജോർജ് എന്നിവർ ചേർന്ന് കല്ലിടൽ ശുശ്രൂഷ നിർവഹിക്കുന്നു. ബ്ലസൻ മാത്യു, സന്ദീപ് വിളമ്പുകണ്ടം തുടങ്ങിയവർ സമീപം (ഫയൽ ചിത്രം)
കല്ലിടൽ ശുശ്രൂഷ (ഫയൽ ചിത്രം)
പ്രാരംഭ നിർമ്മാണ പ്രവർത്തനങ്ങൾ പാസ്റ്റർ അലക്സാണ്ടർ ഫിലിപ്പ് പ്രാർത്ഥിച്ച് ആരംഭിക്കുന്നു. ഫിന്നി മാത്യു സമീപം (ഫയൽ ചിത്രം)
ഗുഡ്ന്യൂസ് പ്രവർത്തകർ പദ്ധതി ഭൂമിയിൽ (ഫയൽ ചിത്രം)
Advertisement
