ക്യാൻസൽ ആക്കപെടുന്ന പ്രോസ്പിരിറ്റി ദൈവത്തിൽ നിന്നോ? 

എന്താണ് "യഥാർത്ഥ അഭിവൃദ്ധി" തിരുവചന വീക്ഷണത്തിലൂടെ...

ഇവാ. മോൻസി മാമ്മൻ (വൈസ് പ്രസിഡന്റ്, പിവൈപിഎ കേരള സ്റ്റേറ്റ്)

അഭിവൃദ്ധി (prosperity)  എന്നത് ചരിത്രത്തിലുടനീളം വ്യാപകമായി ചർച്ച ചെയ്യപ്പെടുകയും പ്രത്യേകിച്ച് ക്രിസ്ത്യാനികൾക്കിടയിൽ ചർച്ച ചെയ്യപ്പെടുകയും വിമർശനങ്ങൾക്ക് വിധേയപ്പെടുകയും ചെയ്ത ഒരു വിഷയമാണ്.  ദൈവത്തിൽ വിശ്വസിക്കുന്നവർ അഭിവൃദ്ധിയുള്ളവരായിരിക്കണമെന്ന് ദൈവം ആഗ്രഹിക്കുന്നുവെന്ന് ബൈബിൾ പഠിപ്പിക്കുന്നുവെന്ന് ചിലർ വാദിക്കുന്നു, മറ്റുള്ളവർ സമ്പത്തും ഭൗതിക സമ്പത്തും തേടുന്നത് തിരുവെഴുത്തുകളുടെ പഠിപ്പിക്കലുകൾക്ക് വിരുദ്ധമാണെന്ന് വാദിക്കുകയും പഠിപ്പിക്കുകയും ചെയ്യുന്നു. എന്നാൽ നാം തിരുവെഴുത്തുകൾ പരിശോധിക്കുമ്പോൾ, ദൈവം തന്റെ  ജനത്തിൻ്റെ ജീവിതത്തിൽ സമൃദ്ധിക്കും അനുഗ്രഹങ്ങൾക്കും വേണ്ടിയുള്ള ദൈവത്തിൻ്റെ പദ്ധതിയെക്കുറിച്ചുള്ള സന്തുലിതവും കൃത്യവുമായ ധാരണ നമുക്ക് കണ്ടെത്താനാകും.

ബൈബിൾ എന്ത് പറയുന്നു എന്ന് ചിന്തിക്കുന്നതിനു മുൻപ്  അഭിവൃദ്ധി എന്നതുകൊണ്ട് എന്താണ് ഉദ്ദേശിക്കുന്നതെന്ന് കൃത്യമായി മനസിലാക്കേണ്ടതുണ്ട് . അഭിവൃദ്ധി എന്നത്  വിവിധമായ നിലകളിൽ ഒരു വ്യകതി ജീവിതത്തിൽ വിജയകരമായ അവസ്ഥയിലേക്ക് മാറുന്നതിനെ സൂചിപ്പിക്കുന്നു. അത് ഒരു വ്യക്തിയുടെ  ഭൗതിക സമ്പത്ത്, ശാരീരിക ആരോഗ്യം, വൈകാരിക ക്ഷേമം, ആത്മീയ വളർച്ച എന്നിവ ഉൾപ്പെടെയുള്ള ജീവിതത്തിൻ്റെ വിവിധ തലങ്ങൾ  അതിൽ ഉൾപ്പെടുന്നു. 

ബൈബിളിൻ്റെ പശ്ചാത്തലത്തിൽ അഭിവൃദ്ധി എന്നത് ദൈവം തന്നെ അന്വേഷിക്കുന്ന ആരാധിക്കുന്ന തന്റെ വചനത്തിൽ ആശ്രയിച്ചു ജീവിക്കുന്ന  തൻ്റെ ജനത്തിന് നൽകുന്ന അനുഗ്രഹങ്ങളെയും സമൃദ്ധിയെയും സൂചിപ്പിക്കുന്നു, അവർ അവൻ്റെ കൽപ്പനകൾ അനുസരിക്കുകയും അവൻ്റെ വാഗ്ദാനങ്ങളിൽ വിശ്വസിക്കുകയും ചെയ്യുന്നു.

കർത്താവ് അബ്രാമിനോട് അരുളിച്ചെയ്തു: “നിൻ്റെ നാട്ടിൽ നിന്നും നിൻ്റെ ജനത്തെയും പിതൃഭവനത്തെയും വിട്ട് ഞാൻ കാണിച്ചുതരുന്ന ദേശത്തേക്ക് പോകുക. "ഞാൻ നിന്നെ  ഒരു വലിയ ജനതയാക്കും, ഞാൻ നിന്നെ  അനുഗ്രഹിക്കും; ഞാൻ നിന്റെ  പേര് വലുതാകും , നീ ഒരു അനുഗ്രഹമായിരിക്കും. നീ  അനുഗ്രഹിക്കുന്നവരെ ഞാൻ അനുഗ്രഹിക്കും, നിന്നെ ശപിക്കുന്നവരെ ഞാൻ ശപിക്കും, ഭൂമിയിലുള്ള സകല ജനതകളും നിന്നിലൂടെ അനുഗ്രഹിക്കപ്പെടും.(ഉല്പത്തി 12:1-3) അബ്രഹാമുമായുള്ള ദൈവത്തിൻ്റെ ഉടമ്പടിയിൽ തുടങ്ങി പഴയനിയമത്തിൽ സമൃദ്ധി എന്ന ആശയം ആഴത്തിൽ വേരൂന്നിയതാണ്. ഉല്പത്തി 12:1-3 - ൽ , ദൈവം അബ്രഹാമിനെ അനുഗ്രഹിക്കുമെന്നും അനേകം സന്തതികളും ഭൗതിക സമ്പത്തും ഉള്ള ഒരു വലിയ ജനതയാക്കുമെന്നും വാഗ്ദാനം ചെയ്യുന്നു.  ഈ ഉടമ്പടി ഉല്പത്തി 15-ലും 17-ലും വീണ്ടും ആവർത്തിച്ചിരിക്കുന്നതായും കാണാം. 

അവിടെ ദൈവം അബ്രഹാമിനും അവൻ്റെ സന്തതികൾക്കും കനാൻ ദേശം ശാശ്വതമായ ഒരു അവകാശമായി നൽകുമെന്ന് വാഗ്ദാനം ചെയ്യുന്നു. ബൈബിളിൽ അഭിവൃദ്ധി മനസ്സിലാക്കുന്നതിനുള്ള അടിസ്ഥാന തത്വം അബ്രഹാമുമായുള്ള ദൈവീക  ഉടമ്പടി യഥാർത്ഥമായ നിലയിൽ മനസിലാക്കുന്നതിലൂടെയാണ്.  ദൈവത്തിൻ്റെ അനുഗ്രഹങ്ങളും സമൃദ്ധിയും, ഉടമ്പടി വാഗ്ദാനങ്ങളോടും ദൈവജനത്തിൻ്റെ ദൈവത്തോടുള്ള അനുസരണത്തോടും ജീവിതത്തോടും നേരിട്ട് ബന്ധപ്പെട്ടിരിക്കുന്നു. അബ്രഹാമും അവൻ്റെ സന്തതികളും വിശ്വാസത്തിലും അനുസരണത്തിലും നടന്നപ്പോൾ ദൈവം വാഗ്‌ദാനം ചെയ്‌ത അനുഗ്രഹങ്ങളും സമൃദ്ധിയും അവർ അനുഭവിച്ചു.

ആവർത്തനം 28:11 ലൂടെ ദൈവവും ഇസ്രായേൽ ജനതയും തമ്മിൽ സീനായ് പർവതത്തിൽ സ്ഥാപിച്ച മോശയുമായുള്ള  ഉടമ്പടിയിലൂടെ  സമൃദ്ധിയുടെ ആശയത്തെ  കൂടുതൽ വിശാലമായ തലത്തിലേക്ക് കൊണ്ടെത്തിക്കുകയാണ്. 

ആവർത്തനപുസ്‌തകം 28- ൽ ദൈവം തൻ്റെ കൽപ്പനകൾ അനുസരിച്ചാൽ ഇസ്രായേൽ മേൽ വരാനിരിക്കുന്ന അനുഗ്രഹങ്ങളെയും അവർ അനുസരണക്കേട് കാണിച്ചാൽ ഉണ്ടാകുന്ന ശാപങ്ങളെയും കുറിച്ചു പറയുന്നുണ്ട്. അനുഗ്രഹങ്ങളിൽ സമൃദ്ധമായ വിളവെടുപ്പ്, ശത്രുക്കൾക്കെതിരായ വിജയം, ഭൗതിക സമ്പത്ത് എന്നിവ ഉൾപ്പെടുന്നു ( ആവർത്തനം 28:1-14 ). ശാപങ്ങളിൽ ക്ഷാമം, രോഗം, ദാരിദ്ര്യം എന്നിവ ഉൾപ്പെടുന്നു ( ആവർത്തനം 28:15-68 ).ഈ ഭാഗത്തിലൂടെ  പഴയനിയമത്തിലെ അഭിവൃദ്ധിയുടെ ദൈവീക  സോപാധിക സ്വഭാവത്തെ എടുത്തുകാണിക്കുന്നു.  ദൈവത്തിൻ്റെ അനുഗ്രഹങ്ങളും സമൃദ്ധിയും ഇസ്രായേലിൻ്റെ  ദൈവീക കൽപ്പനകളോടുള്ള അനുസരണത്തെ ആശ്രയിച്ചിരിക്കുന്നു എന്ന് വ്യകതമായി മനസിലാക്കുവാൻ സാധിക്കും.  ഇസ്രായേൽ മക്കൾ ദൈവീക  നിയമങ്ങൾ കൃത്യമായി  പിന്തുടർന്നപ്പോൾ, അവർ അഭിവൃദ്ധി അനുഭവിക്കുകയും ദൈവത്തിൽ നിന്ന് അകന്ന് വിപരീതമായ ജീവിത രീതി അവലംബിച്ചപ്പോൾ അവർ ദൈവത്തിൽ  നിന്ന് അതിന്റെ പരിണിത ഫലം കാലാകാലങ്ങളിൽ നേരിട്ടത് പഴയനിയമത്തിൽ കൃത്യമായി രേഖപ്പെടുത്തിയിട്ടുണ്ട്. 

പഴയ നിയമത്തിലെ ജ്ഞാന സാഹിത്യങ്ങളിൽ , സദൃശവാക്യങ്ങളുടെയും സഭാപ്രസംഗിയുടെയും പുസ്തകങ്ങൾ, സമൃദ്ധിയുടെ സ്വഭാവത്തെക്കുറിച്ച് കൂടുതൽ ഉൾക്കാഴ്ചകൾ നൽകുന്നതായി കാണുവാൻ സാധിക്കും. 

സദൃശവാക്യങ്ങൾ പലപ്പോഴും ജ്ഞാനത്തെയും നീതിയെയും ഭൗതിക സമ്പത്തും വിജയവുമായി ബന്ധിപ്പിക്കുന്നു. സദൃശവാക്യങ്ങൾ 3:13-18 , സദൃശവാക്യങ്ങൾ 8:18-21, സദൃശവാക്യങ്ങൾ 10:22 - ദൈവീക സമൃദ്ധിയുടെ കൃത്യമായ വിവരണങ്ങളാണ് നൽകുന്നത് . അത് പോലെ തന്നെ നമ്മുടെ ആത്മീയയുടെ പേരിൽ ഭൗതീക  സമ്പത്ത് പിന്തുടരുന്നതിൻ്റെ അപകടങ്ങൾക്കെതിരെയും ഇത് മുന്നറിയിപ്പ് നൽകുന്നു. സദൃശവാക്യങ്ങൾ 11:28 - തങ്ങളുടെ സമ്പത്തിൽ ആശ്രയിക്കുന്നവർ വീഴും, സദൃശവാക്യങ്ങൾ 23: 4-5 - സമ്പന്നനാകാൻ സ്വയം ക്ഷീണിക്കരുത് എന്നീ വാക്യങ്ങളിലൂടെ അമിതമായ സമ്പത്തു വിളിച്ചു വരുത്തുന്ന അപകടങ്ങളെ കുറിച്ചും സദൃശ്യ വാക്യങ്ങൾ കൃത്യമായ മുന്നറിയിപ്പ് നൽകുന്നുണ്ട്. 

സഭാപ്രസംഗിയിലേക്ക് എത്തുമ്പോൾ , അഭിവൃദ്ധിയെക്കുറിച്ച് വ്യത്യസ്തമായ ഒരു വീക്ഷണമാണ് ഗ്രന്ഥകാരൻ വരച്ചു കാട്ടുന്നത്.  ശലോമോൻ ഭൗതീക സമ്പത്തിൻ്റെയും വിജയത്തിൻ്റെയും നേട്ടങ്ങൾ  സ്വന്തം ജീവിതത്തിലെ അനുഭവങ്ങളെ മുൻനിർത്തിയാണ് രേഖപ്പെടുത്തിയിരിക്കുന്നത്.  ആത്യന്തികമായി ശലോമോൻ തെളിയിക്കുന്ന ഒരു സത്യം ഭൗതിക അഭിവൃദ്ധി  ദൈവവുമായുള്ള ശരിയായ ബന്ധത്തിന് വിള്ളലുണ്ടാക്കുമെന്നും അത് പുറമെ അർത്ഥശൂന്യമാണെന്ന് നിഗമനത്തിലേക്ക് സ്വയം എത്തുകയും ചെയ്യുന്നു .സഭാപ്രസംഗി 2:22-25 , 5:10-20 എന്നീ ഭാഗങ്ങൾ പഠന വിധേയമാക്കുമ്പോൾ യഥാർത്ഥ അഭിവൃദ്ധി ഭൗതിക സ്വത്തുക്കളിൽ മാത്രമല്ല, ദൈവഹിതത്തിനും ഉദ്ദേശ്യങ്ങൾക്കും കീഴ്‌പ്പെട്ട് ജീവിക്കുന്ന ഒരു ജീവിതത്തിലാണെന്ന ഓർമ്മപ്പെടുത്തലാണ് എന്നാണ്  ശലോമോൻ പറഞ്ഞവസാനിപ്പിക്കുന്നത്..

പുതിയനിയമത്തിലേക്ക് പ്രവേശിക്കുമ്പോൾ യേശു തന്റെ  ഗിരിപ്രഭാഷണത്തിൽ, പരമ്പരാഗതമായാ ചിന്താധാരകളെ  മാറ്റി മറിക്കുന്ന കാഴ്ചപ്പാടാണ് തന്റെ മുന്നിൽ വന്നിരിക്കുന്ന ജനത്തോട് പങ്കുവെച്ചത്.  യഥാർത്ഥ അനുഗ്രഹങ്ങൾ ഭൗതിക സമ്പത്തിലൂടെയല്ല, മറിച്ച് താഴ്മ, നീതി, കരുണ തുടങ്ങിയ ആത്മീയ ഗുണങ്ങളിലൂടെയാണെന്ന് പഠിപ്പിക്കുന്നു ( മത്തായി 5:3-12 ). ഭൗതീക സമ്പത്തിന്റെ  അപകടങ്ങൾക്കെതിരെ യേശു കൃത്യമായ  മുന്നറിയിപ്പ് നൽകുന്നു, ഭൂമിയിലല്ല സ്വർഗത്തിൽ നിക്ഷേപങ്ങൾ സംഭരിക്കാൻ തൻ്റെ പിന്നാലെ വരുന്നവരെ  പ്രേരിപ്പിക്കുകയും സമ്പന്നർക്ക് ദൈവരാജ്യത്തിൽ പ്രവേശിക്കുന്നത് ബുദ്ധിമുട്ടാണെന്ന് മുന്നറിയിപ്പ് നൽകുകയും ചെയ്യുന്നു. മത്തായി 6:19-21. നിങ്ങളുടെ നിക്ഷേപം എവിടെയാണോ അവിടെ നിങ്ങളുടെ ഹൃദയവും ഉണ്ടാകും. മത്തായി 19:23-24 - അനന്തരം യേശു തൻ്റെ ശിഷ്യന്മാരോടു പറഞ്ഞു, “സത്യമായി ഞാൻ നിങ്ങളോടു പറയുന്നു, ധനികനായ ഒരാൾക്ക് സ്വർഗ്ഗരാജ്യത്തിൽ പ്രവേശിക്കുക പ്രയാസമാണ്. ധനവാനായ ഒരാൾ ദൈവരാജ്യത്തിൽ പ്രവേശിക്കുന്നതിനെക്കാൾ എളുപ്പം ഒട്ടകം സൂചിക്കുഴയിലൂടെ കടക്കുന്നതാണെന്ന് ഞാൻ വീണ്ടും നിങ്ങളോടു പറയുന്നു. 

അതേ സമയം തന്നെ അനുഗമിക്കുന്നവരുടെ മുന്നിൽ  താൻ നൽകുന്ന സമൃദ്ധമായ ജീവിതത്തെക്കുറിച്ചും യേശു കൃത്യമായി തന്നെ അനുഗമിക്കുന്നവരോട് പ്രബോധിപ്പിക്കുന്നത് സുവിശേഷ ഗ്രന്ഥങ്ങളിൽ വായിക്കുവാൻ സാധിക്കും. നമ്മുടെ എല്ലാ ആവശ്യങ്ങളും ദൈവം നൽകും, അവൻ്റെ സമൃദ്ധിയിലും ഔദാര്യത്തിലും നമുക്ക് വിശ്വസിക്കാം. ഫിലിപ്പിയർ 4:19 - "എൻ്റെ ദൈവം ക്രിസ്തുയേശുവിൽ തൻ്റെ മഹത്വത്തിൻ്റെ ഐശ്വര്യത്തിനൊത്തവണ്ണം നിങ്ങളുടെ എല്ലാ ആവശ്യങ്ങളും നിറവേറ്റും."  യഥാർത്ഥ സമൃദ്ധി പ്രാഥമികമായി ഭൗതികമല്ല, മറിച്ച് സമാധാനവും സന്തോഷവും ആത്മീയ വളർച്ചയും ഉൾപ്പെടെ ക്രിസ്തുവുമായുള്ള ബന്ധത്തിലൂടെ ലഭിക്കുന്ന ജീവിതത്തിൻ്റെ പൂർണ്ണതയാണെന്ന് പുതിയ നിയമത്തിലെ ക്രിസ്തു കേന്ദ്രീകൃത പഠനത്തിലൂടെ മനസിലാക്കുവാൻ സാധിക്കും.

യഥാർത്ഥ അഭിവൃദ്ധി എന്നത്  ഒറ്റവാക്കിൽ സംഗ്രഹിക്കാമെന്ന് അപ്പോസ്തലന്മാർ കൃത്യമായി ഒന്നാം നൂറ്റാണ്ടിലെ സഭയെ പ്രബോധിപ്പിക്കുകയും അത് ഇന്നിന്റെ കാലത്തു വളരെ അർത്ഥവത്തായ ഒരു പഠിപ്പിക്കൽ ആണെന്ന് നമുക്ക് മനസിലാക്കുവാൻ സാധിക്കും . അപ്പോസ്തലന്മാരുടെ പഠിപ്പിക്കലുകലുകളിൽ യഥാർത്ഥ സമൃദ്ധി എന്ന വാക്കിന്റെ അർത്ഥം “സംതൃപ്തി” എന്ന ഒറ്റവാക്കിലൊതുക്കുവാൻ സാധിക്കും. കൂടുതൽ സമ്പത്തിനും ഭൗതിക സമ്പത്തിനും വേണ്ടി നിരന്തരം പരിശ്രമിക്കുന്നതിനുപകരം, ഉള്ളതിൽ സംതൃപ്തരായിരിക്കുന്നതിൽ നിന്നാണ് യഥാർത്ഥ അഭിവൃദ്ധി ഉണ്ടാകുന്നത് എന്ന് അവർ വിശ്വസികുകയും പഠിപ്പിക്കുകയും ജീവിതത്തിൽ പ്രവർത്തികമാക്കുകയും ചെയ്തതായി നമുക്ക് കാണാം.  

ദൈവം നമ്മുടെ  ആവശ്യങ്ങൾ നിറവേറ്റും എന്ന അടിയുറച്ച വിശ്വാസവും ഭൗതിക  അഭിവൃദ്ധി നേടുന്നതിനേക്കാൾ അപ്പുറമായി  ദൈവത്തെ യഥാർത്ഥമായി  സേവിക്കുന്നതിലായിരിക്കണം ഒരു ക്രിസ്തു ശിഷ്യൻ കൂടുതൽ ശ്രദ്ധ ചെലുത്തേണ്ടത്.  വാസ്‌തവത്തിൽ, ഭൗതിക സമ്പത്തിനോടുള്ള  സ്‌നേഹത്തിനും സമ്പത്തിനെ പിന്തുടരുന്നതിനും എതിരെ ബൈബിൾ കൃത്യമായ  മുന്നറിയിപ്പ് നൽകുന്നുണ്ട് , അത് എല്ലാത്തരം തിന്മകളുടെയും മൂലമാണെന്ന് പ്രസ്താവിക്കുന്നു . ക്രിസ്ത്യാനികൾ തങ്ങളുടെ വിഭവങ്ങളിൽ ഉദാരമനസ്കത കാണിക്കണമെന്നും തങ്ങളുടെ സമ്പത്ത് ആവശ്യമുള്ളവരെ സഹായിക്കാൻ ഉപയോഗിക്കണമെന്നും അപ്പോസ്തലന്മാർ പഠിപ്പിച്ചു.  ഉദാരമായി നൽകുന്നവരെ ദൈവം അനുഗ്രഹിക്കുമെന്നും , അവൻ നൽകിയ അനുഗ്രഹങ്ങൾക്ക് നന്ദി പ്രകടിപ്പിക്കാനുള്ള ഒരു മാർഗമാണ് കൊടുക്കുന്നതെന്നും  അവർ വിശ്വസിച്ചു . ആദിമ ക്രിസ്ത്യൻ സമൂഹം അവരുടെ ഔദാര്യത്തിനും പരസ്പരം പങ്കിടാനുള്ള സന്നദ്ധതയ്ക്കും പേരുകേട്ടതാണ്, അവരുടെ സ്വത്തുക്കൾ വിറ്റ് വരുമാനം ആവശ്യമുള്ളവർക്ക് നൽകുന്നതുവരെ. സമ്പത്തിനോടും സ്വത്തുക്കളോടും ഉള്ള ഈ നിസ്വാർത്ഥ മനോഭാവം ആദിമ സഭയുടെ മുഖമുദ്രയായിരുന്നു, എന്നാൽ സമൃദ്ധിയെക്കുറിച്ചുള്ള ക്രിസ്ത്യൻ പഠിപ്പിക്കലുകൾ ആദിമ സഭയുടേതിൽ നിന്നും വളരെ വിഭിന്നമായി പോയി എന്നുള്ളത് എടുത്തു കാട്ടേണ്ട ഒരു യാഥാർഥ്യം തന്നെയാണ്. 

ദൈവം നമുക്കായി പ്രദാനം ചെയ്‌തിരിക്കുന്നതിൽ നാം നന്ദിയുള്ളവരും തൃപ്‌തിയുള്ളവരുമായിരിക്കാൻ ദൈവം ആഗ്രഹിക്കുന്നു. ലോകം അത്യാഗ്രഹ മനോഭാവത്തോടെ സമ്പത്തിനെ പിന്തുടരുന്നു.  ആ അത്യാഗ്രഹമാണ് പലപ്പോഴും നമ്മെ ദൈവത്തിൽ നിന്ന് അകറ്റുകയും ദൈവീക വചനങ്ങളെ വികലമായി പഠിപ്പിക്കുവാനും പ്രസംഗിക്കുവാനും പ്രേരണ നൽകുന്നത്. പണത്തോടുള്ള ഇഷ്ടം മറ്റുള്ളവരുടെ സമ്പത്തിൽ   അത്യാഗ്രഹികളാകാൻ നമ്മെ പ്രേരിപ്പിക്കുന്നു. സമൃദ്ധിയുടെ പ്രശ്നം! സമ്പത്ത് ഉള്ളതല്ല പ്രശ്നം. അത് നേടിയെടുക്കാൻ നമ്മൾ എങ്ങനെ പ്രവർത്തിക്കുന്നു അല്ലെങ്കിൽ അത് ഉള്ളപ്പോൾ എങ്ങനെ പ്രവർത്തിക്കുന്നു എന്നതാണ് പ്രശ്നം.  മത്തായി 6:33 - "ആദ്യം അവൻ്റെ രാജ്യവും നീതിയും അന്വേഷിപ്പിൻ, എന്നാൽ ഇവയെല്ലാം നിങ്ങൾക്കും ലഭിക്കും."

നമ്മുടെ വിജയത്തിൻ്റെ മാതൃക ഒരു പ്രസ്ഥാനമല്ല , അത് ഒരു സെലിബ്രിറ്റിയല്ല, അത് കർത്താവായ യേശുക്രിസ്തുവാണ്. യേശു ഈ ലോകത്തു ജീവിച്ചപ്പോൾ സാധാരണക്കാരനായ ഒരു ശരാശരി ജീവിത നിലവാരം പുലർത്തിയ ജീവിതമായിരുന്നു യേശുവിനുണ്ടായിരുന്നത്, അധികം  പണമില്ലായിരുന്നു, എന്നാൽ യേശുവിനാൽ അനുഗ്രഹിക്കപെട്ടവരുടെ, ജീവിതം മാറ്റി മറിക്കപ്പെട്ടവരുടെ ഒരു വലിയ നിര തന്നെ ക്രിസ്തീയ ചരിത്രത്തിൽ നമുക്ക് കാണുവാൻ കഴിയും. പുതിയ നിയമ വിശ്വാസികൾ എന്ന നിലയിൽ നാം ഒരു അത്ഭുതത്തിനോ മുന്നേറ്റത്തിനോ വേണ്ടി മാത്രം ദൈവത്തെ അന്വേഷിക്കുന്നവർ ആയി മാറരുത്. അഭിഷേകത്തിൽ നിന്ന് ഭൗതിക സമൃദ്ധിയുടെ നേട്ടമുണ്ടാക്കാൻ അല്ല ദൈവീക ശുശ്രുഷ,  മറിച്ച് മനസ്സൊരുക്കമുള്ള ഹൃദയത്തിൽ നിന്നാണ് ഇത് ചെയ്യേണ്ടത്. ഏലിയാവിൻ്റെ അഭിഷേകത്തിൻ്റെ ഇരട്ടി വിഹിതം ലഭിക്കാൻ എലീശാ ഒരു എളുപ്പ വഴിയിലൂടെയും സഞ്ചരിച്ചില്ല , ദൈവം ഏലിയാവിലൂടെ അരുളിച്ചെയ്ത കാര്യങ്ങൾക്ക് വിധേയമായി അവസാനം വരെ യജമാനനെ വിശ്വസ്തതയോടെ സേവിച്ചു. യോശുവ മോശെ വിതച്ചതുകൊണ്ടല്ല ദൈവീക ജ്ഞാനം അവകാശമാക്കിയത്, യോശുവ ദൈവ സന്നിധിയിൽ ഒരു വിശ്വസ്ത ദാസനായിരുന്നു. വല തകർക്കുന്ന മീൻപിടിത്തം ലഭിക്കുമെന്ന് പ്രതീക്ഷിച്ചല്ല  പത്രോസ് തൻ്റെ പടക് യേശുവിന് വിട്ടുകൊടുത്തത് , പത്രോസ് മനസ്സില്ലാമനസ്സോടെയാണ് പടക് വിട്ടു കൊടുത്തത്.  മീൻ പിടിക്കുന്നതിനെക്കുറിച്ചുള്ള സംഭാഷണത്തിന് തുടക്കമിട്ടത് യേശുവാണ്. വല വീശാനുള്ള യേശുവിൻ്റെ നിർദ്ദേശം അനുസരിക്കുകയും തൻ്റെ വഞ്ചി വാഗ്ദാനം ചെയ്യുകയും ചെയ്തുകൊണ്ട് പത്രോസ് വിന്യസിച്ചതാണ് അത്ഭുതത്തിലേക്ക് നയിച്ചത്. 

ഏലിയാവിന് തൻ്റെ അവസാനത്തെ ഭക്ഷണം നൽകിയ സാരെഫാത്തിലെ വിധവ, അത് ചെയ്തപ്പോൾ ക്ഷാമം മുഴുവൻ താങ്ങാൻ ആഗ്രഹിച്ചില്ല. ഏലിയാവിനായി കരുതലുകൾ ഉണ്ടാക്കാൻ ദൈവം അവളോട് നിർദ്ദേശിച്ചു, ദൈവം അവളുടെ വീട്ടിലേക്ക് അയച്ച പ്രവാചകനെ അവൾ ആദരിച്ചു. യഥാർത്ഥ അഭിവൃദ്ധി എന്താണെന്ന് നമ്മോട് പറയുന്ന നിരവധി ഉദാഹരണങ്ങൾ തിരുവെഴുത്തുകളുടെ പേജുകളിൽ ധാരാളമുണ്ട്. ആത്മാവിനെ തൃപ്‌തിപ്പെടുത്താത്ത ഭൗതിക കാര്യങ്ങൾക്കായി നാം അവൻ്റെ പാതയിൽ നിന്ന് അകന്നുപോകുമ്പോൾ ദൈവത്തിൽ നിന്ന് നാം അകലുകയാണ് ചെയ്യുന്നത്. ഇന്നിന്റെ കാലത്തു ഭൗതിക സമൃദ്ധിയേക്കാൾ ആത്‌മീയ സമൃദ്ധയിലേക്ക് നയിക്കപ്പെടുവാൻ  ദൈവം നമ്മുടെ കണ്ണുകൾ തുറക്കുകയും നമ്മുടെ ഹൃദയങ്ങളെ ബോധ്യപ്പെടുത്തുകയും ചെയ്യട്ടെ.

Advertisement