നീതിയുടെ ശബ്ദത്തിന് നൊബേൽ ആദരം !
2026-ലെ സമാധാന നൊബേൽ ഇന്ത്യൻ വംശജ നവി പിള്ളയ്ക്ക്
വാർത്ത: മോൻസി മാമ്മൻ, തിരുവനന്തപുരം
അന്താരാഷ്ട്ര നിയമവാഴ്ചയും മനുഷ്യാവകാശങ്ങളും സംരക്ഷിക്കുന്നതിനും സമാധാനം പ്രോത്സാഹിപ്പിക്കുന്നതിനുമുള്ള ദീർഘകാല പ്രവർത്തനങ്ങളെ മാനിച്ച് 2026-ലെ സമാധാനത്തിനുള്ള നൊബേൽ സമ്മാനം ദക്ഷിണാഫ്രിക്കൻ നിയമജ്ഞയും മുൻ ഐക്യരാഷ്ട്രസഭ മനുഷ്യാവകാശ ഹൈക്കമ്മീഷണറുമായ നവനീതം നവി പിള്ളയ്ക്ക് ലഭിച്ചു.
യുദ്ധക്കുറ്റങ്ങൾക്കും മനുഷ്യരാശിക്കെതിരായ കുറ്റകൃത്യങ്ങൾക്കും വംശഹത്യയ്ക്കും ഉത്തരവാദികളായവരെ നിയമത്തിനു മുന്നിൽ കൊണ്ടുവരുന്നതിനുള്ള പ്രവർത്തനങ്ങളും അന്താരാഷ്ട്ര നീതിന്യായ സംവിധാനത്തെ ശക്തിപ്പെടുത്തുന്നതിൽ നൽകിയ സംഭാവനകളുമാണ് പുരസ്കാരത്തിന് അർഹമാക്കിയത്.
ഇന്ത്യൻ തമിഴ് വംശജയായ നവി പിള്ള ദക്ഷിണാഫ്രിക്കയിലെ വർണവിവേചന കാലഘട്ടത്തിൽ വളർന്നുവന്ന വ്യക്തിയാണ്. വർണവിവേചനത്തിനെതിരെ പോരാടിയവരുടെ അവകാശങ്ങൾക്കായി നിയമരംഗത്ത് പ്രവർത്തിച്ച അവർ പിന്നീട് ദക്ഷിണാഫ്രിക്കൻ ഹൈക്കോടതി, റുവാണ്ടയ്ക്കായുള്ള അന്താരാഷ്ട്ര ക്രിമിനൽ ട്രൈബ്യൂണൽ, അന്താരാഷ്ട്ര ക്രിമിനൽ കോടതി എന്നിവിടങ്ങളിൽ നിർണായക ചുമതലകൾ വഹിച്ചു. 2008 മുതൽ 2014 വരെ ഐക്യരാഷ്ട്രസഭയുടെ മനുഷ്യാവകാശ ഹൈക്കമ്മീഷണറായും സേവനമനുഷ്ഠിച്ചു.
അന്താരാഷ്ട്ര നീതിന്യായ കോടതിയുമായി ബന്ധപ്പെട്ട പ്രവർത്തനങ്ങളിലും ഐക്യരാഷ്ട്രസഭയുടെ അന്വേഷണ കമ്മീഷനുകളിലെ നേതൃത്വത്തിലും അവർ നൽകിയ സംഭാവനകൾ ആഗോളതലത്തിൽ ശ്രദ്ധേയമാണ്.
യുദ്ധങ്ങളും സംഘർഷങ്ങളും വർധിച്ചുവരുന്ന ഇന്നത്തെ ലോകത്ത്, അധികാരത്തിനും രാഷ്ട്രീയ താൽപര്യങ്ങൾക്കും മുകളിൽ നിയമവും നീതിയും നിലകൊള്ളേണ്ടതിന്റെ പ്രാധാന്യം ഈ പുരസ്കാരം വീണ്ടും ഓർമിപ്പിക്കുന്നു. സമാധാനം എന്നത് യുദ്ധത്തിന്റെ അഭാവം മാത്രമല്ല, മനുഷ്യന്റെ അന്തസ്സും അവകാശങ്ങളും സംരക്ഷിക്കപ്പെടുന്ന നീതിപൂർവമായ ലോകത്തിന്റെ സൃഷ്ടിയുമാണെന്ന സന്ദേശമാണ് ഈ അംഗീകാരം മുന്നോട്ടുവയ്ക്കുന്നത്.
അന്താരാഷ്ട്ര നിയമവാഴ്ചയും മനുഷ്യാവകാശ സംരക്ഷണവും ശക്തിപ്പെടുത്തുന്നതിനുള്ള നവി പിള്ളയുടെ പ്രവർത്തനങ്ങൾ ലോകമെമ്പാടുമുള്ള നീതിക്കും സമാധാനത്തിനും വേണ്ടി നിലകൊള്ളുന്നവർക്ക് ഈ സമാധാന പുരസ്കാരം പ്രചോദനമാകുമെന്ന് പ്രതീക്ഷിക്കുന്നു എന്ന് പുരസ്‌കാര കമ്മിറ്റി പത്രകുറിപ്പിൽ അറിയിച്ചു.
