ഭരണഘടന ആമുഖത്തിൽ 'മതേതരത്വം', 'സോഷ്യലിസ്റ്റ്' എന്നീ പദങ്ങൾ മാറ്റണം: സ്വകാര്യ ബില്ലുമായി ബിജെപി എംപി

വാർത്ത: മോൻസി മാമ്മൻ തിരുവനന്തപുരം

ന്യൂഡൽഹി: ഭരണഘടനയുടെ ആമുഖത്തിൽ 'മതേതര', 'സോഷ്യലിസ്റ്റ്' എന്നീ പദങ്ങൾ നിർബന്ധമല്ലെന്നും അടിയന്തരാവസ്ഥക്കാലത്ത് ജനാധിപത്യവിരുദ്ധ രീതിയിൽ ചേർത്തതാണെന്നും ബിജെപി രാജ്യസഭാ എംപി ഭീം സിംഗ് പറഞ്ഞു. ഈ വാക്കുകൾ നീക്കം ചെയ്യുന്നതിനായി രാജ്യ സഭയിൽ സ്വകാര്യ അംഗ ബിൽ അവതരിപ്പിച്ചു. വെള്ളിയാഴ്ച രാജ്യസഭയിൽ ഭരണഘടന (ഭേദഗതി) ബിൽ, 2025 (ആമുഖ ഭേദഗതി) അവതരിപ്പിച്ച സിംഗ്, ആ വാക്കുകൾ "ആശയക്കുഴപ്പം" സൃഷ്ടിക്കുന്നുവെന്നും യഥാർത്ഥ ഭരണഘടനയുടെ ഭാഗമല്ലെന്നും പറഞ്ഞു.

1949-ൽ അംഗീകരിച്ചതും 1950 മുതൽ പ്രാബല്യത്തിൽ വന്നതുമായ യഥാർത്ഥ ഭരണഘടനയിൽ ഈ രണ്ട് വാക്കുകൾ ഉണ്ടായിരുന്നില്ല. 1976-ൽ അടിയന്തരാവസ്ഥക്കാലത്ത് 42-ാമത് ഭരണഘടനാ ഭേദഗതി പ്രകാരം ശ്രീമതി ഇന്ദിരാഗാന്ധി ഈ രണ്ട് വാക്കുകൾ ഭരണഘടനയിൽ ചേർത്തു. ആ സമയത്ത് പാർലമെന്റിൽ ഒരു ചർച്ചയും നടന്നിരുന്നില്ല," സിംഗ് മാധ്യമങ്ങളോട് പറഞ്ഞു .

'മതേതര', 'സോഷ്യലിസ്റ്റ്' എന്നീ വാക്കുകൾ നീക്കം ചെയ്യണമെന്ന് ബിൽ ആവശ്യപ്പെടുന്നു, കൂടാതെ ഭരണഘടനയിലെ ഏതെങ്കിലും മൗലികാവകാശങ്ങളെയോ മറ്റ് വ്യവസ്ഥകളെയോ ഇത് ബാധിക്കില്ലഎന്ന് അദ്ദേഹം ബിൽ അവതരണത്തിന് ശേഷം മറുപടി നൽകി.

മന്ത്രിയല്ലാത്ത ഒരു അംഗം പാർലമെന്റിൽ അവതരിപ്പിക്കുന്ന നിയമനിർമ്മാണ നിർദ്ദേശമാണ് സ്വകാര്യ ബിൽ. ഇന്ത്യൻ പാർലമെന്റിന്റെ ചരിത്രത്തിൽ 14 സ്വകാര്യ ബില്ലുകൾ മാത്രമേ നിയമമായി പാസാക്കിയിട്ടുള്ളൂ, 1970 മുതൽ ഇരുസഭകളും ഒന്നും പാസാക്കിയിട്ടുമില്ല.

Advt.

Advt.