കാലാവസ്ഥാ വ്യതിയാനത്തിൽ വിറങ്ങലിച്ച് യൂറോപ്പ്

ജർമ്മനി: യൂറോപ്പിലെ ഭൂരിഭാഗം രാജ്യങ്ങളും ഈ ദിവസങ്ങളിൽ അതിശക്തമായ കാലാവസ്ഥാ വ്യതിയാനങ്ങൾ നേരിടുകയാണ്. മാൾട്ട, ഇംഗ്ലണ്ട്, ജർമ്മനി, ഫ്രാൻസ്, ഇറ്റലി, സ്പെയിൻ, ബെൽജിയം, നെതർലാൻഡ്സ്, പോളണ്ട്, ഓസ്ട്രിയ തുടങ്ങി നിരവധി രാജ്യങ്ങളിൽ റെക്കോർഡ് ചൂട് അനുഭവപ്പെടുന്നു .

പല സ്ഥലങ്ങളിലും താപനില 40 ഡിഗ്രി സെൽഷ്യസിന് (104 F) മുകളിലെത്തി. ചില നഗരങ്ങളിൽ ചരിത്രത്തിലെ ഏറ്റവും ഉയർന്ന ജൂൺ മാസ താപനിലയും രേഖപ്പെടുത്തി. ഇംഗ്ലണ്ടിലും സ്കോട്ട്ലൻഡിലും ശക്തമായ ഇടിമിന്നലും മണിക്കൂറുകൾ നീണ്ട കനത്ത മഴയും അനുഭവപ്പെട്ടു. ചില പ്രദേശങ്ങളിൽ വെള്ളപ്പൊക്കമുണ്ടായി. ജർമ്മനി, ഫ്രാൻസ്, ബെൽജിയം എന്നിവിടങ്ങളിലും ഇടിമിന്നലോടുകൂടിയ മഴയും ശക്തമായ കാറ്റും ജനജീവിതത്തെ ബാധിച്ചു. റോഡുകൾ വെള്ളത്തിനടിയിലാകുകയും, റെയിൽ ഗതാഗതം തടസ്സപ്പെടുകയും, വൈദ്യുതി വിതരണത്തിൽ പ്രശ്നങ്ങൾ ഉണ്ടാകുകയും ചെയ്തു.

കാലാവസ്ഥാ വിദഗ്ധർ പറയുന്നത്, ദീർഘനേരം നീണ്ടുനിൽക്കുന്ന അതിശക്തമായ ചൂട് അന്തരീക്ഷത്തിൽ വലിയ അളവിൽ ജലബാഷ്പം ശേഖരിക്കാൻ കാരണമാകുന്നു എന്നതാണ്. പിന്നീട് തണുത്ത വായു എത്തുമ്പോൾ ഈ ജലബാഷ്പം അതിശക്തമായ മഴയായി പെയ്യുന്നു. അതുകൊണ്ടാണ് കടുത്ത ചൂടിന് പിന്നാലെ പെട്ടെന്നുള്ള ഇടിമിന്നലും കനത്ത മഴയും വെള്ളപ്പൊക്കവും ഉണ്ടാകുന്നത്.

ലോക കാലാവസ്ഥാ സംഘടനയുടെ മുന്നറിയിപ്പനുസരിച്ച് യൂറോപ്പ് ലോകത്തിൽ ഏറ്റവും വേഗത്തിൽ ചൂടുപിടിക്കുന്ന ഭൂഖണ്ഡമാണ്. അതിനാൽ വരും വർഷങ്ങളിൽ ഇത്തരം അതിശക്തമായ ചൂടും അതിന് പിന്നാലെയുള്ള കനത്ത മഴയും കൂടുതൽ പതിവാകാൻ സാധ്യതയുണ്ടെന്ന് ശാസ്ത്രജ്ഞർ മുന്നറിയിപ്പ് നൽകുന്നു.

ഈ കാലാവസ്ഥാ വ്യതിയാനങ്ങൾ യൂറോപ്പിലെ ജനങ്ങളുടെ ദൈനംദിന ജീവിതത്തെയും കൃഷിയെയും ഗതാഗതത്തെയും വൈദ്യുതി സംവിധാനങ്ങളെയും സാരമായി ബാധിച്ചിരിക്കുകയാണ്. അധികൃതർ ജനങ്ങളോട് കാലാവസ്ഥാ മുന്നറിയിപ്പുകൾ കർശനമായി പാലിക്കാനും അനാവശ്യ യാത്രകൾ ഒഴിവാക്കാനും സുരക്ഷാ നിർദേശങ്ങൾ ശ്രദ്ധിക്കാനും അഭ്യർഥിച്ചിരിക്കുകയാണ്.

Advertisement