ദർശനമില്ലാത്ത നേതൃത്വം
ദർശനമില്ലാത്ത നേതൃത്വം
സഭാഭരണസമിതി ഏറ്റവും കൂടുതൽ ചർച്ചകൾ നടത്തുന്നത് ഏതു കാര്യത്തിനാണ്? ഏറ്റവും കൂടുതൽ സമയം ചിലവിടുന്നത് ഏതു വിഷയത്തിനാണ്? ഏറ്റവും കൂടുതൽ ആവേശവും ഒച്ചയും ഉണ്ടാക്കുന്നത് എന്തിനെച്ചൊല്ലിയാണ്? അധികം പണം ചിലവാക്കുന്നതും കൂടുതൽ എഴുത്തെഴുതുന്നതും ഏതു കാര്യത്തിനാണ്? ആ കാര്യങ്ങളാണ് ആ സഭയുടെ മുഖ്യവിഷയം എന്നു വരുന്നു. അപ്രധാനവും നിസ്സാരവുമായ കാര്യങ്ങൾ അങ്ങനെ ഒരു സഭയുടെ മുഖ്യലക്ഷ്യമാക്കി മാറ്റുവാൻ ദർശനമില്ലാത്ത നേതൃത്വത്തിനു കഴിയും. ആത്മാക്കളെ നേടുന്നതും, സഭകൾ സ്ഥാപിക്കുന്നതും, മെച്ചമായ ശുശ്രൂഷകവൃന്ദത്തെ ഒരുക്കുന്നതും ത്യാജകോടിയിലേക്കു തള്ളപ്പെടുന്നു. നാളുകൾ അധികം വേണ്ട ആ പ്രസ്ഥാനം ആത്മീയമരണം വരിക്കുവാൻ.
ഏതെങ്കിലും ഒരു പ്രാദേശിക ഘടകത്തിലുണ്ടായ 'ഈഗോ' പ്രശ്നങ്ങൾ (ഞാനാണ് നിങ്ങളെല്ലാവരെക്കാളും വലിയവൻ എന്ന മനോഭാവത്തിൽ നിന്നും ഉണ്ടാവുന്ന (പ്രശ്നങ്ങൾ) ഒരു പ്രസ്ഥാന ഭരണസമിതിയുടെ ശ്രദ്ധയും സമയവും ഐക്യതയും അപഹരിക്കുവാൻ അനുവദിച്ചുകൂടാ. സൃഷ്ടിപരമായ ചിന്തകളിലൂടെ ദൈവീക ദശനത്തെ പ്രാവർ ത്തികമാക്കുവാനുള്ള പരിശ്രമങ്ങളാണ് ഭരണസമിതിയുടെ മുഖ്യവിഷയമാകേണ്ടത്. ഇത്തരം ഈഗോ പ്രശ്നങ്ങളെ നേതൃത്വം താലോലിക്കയില്ല എന്നു വരുമ്പോൾ പല പ്രശ്നങ്ങളും നിസ്സാരങ്ങളാണെന്നു വെളിവാകും.
പ്രസ്ഥാനത്തിൻ്റെ പൊതുവായ ഗുണനിലവാരത്തകർച്ചയുടെ കഥകൾ പ്രവർത്തകരുടെ മനോവീര്യം കെടുത്തി ക്കളയും. പത്തുവർഷം കൊണ്ടു നേടിയ നേട്ടങ്ങൾ ഒരു മാസം കൊണ്ടു തകർന്നുപോകും.
കഥകളിലൂടെയാണ് പ്രസ്ഥാനത്തിൻ്റെ പ്രതിഛായ മെച്ചപ്പെടുകയോ തകരുകയോ ചെയ്യുന്നത്. കഥകൾ വ്യാജങ്ങളായാലും കെട്ടിച്ചമച്ചതായാലും പ്രസ്ഥാനത്തിൻ്റെ പൊതുവായ അന്തരീക്ഷത്തിനനുസരിച്ച് കഥകൾ വിശ്വസനീയങ്ങളായി മാറും. കെടുകാര്യസ്ഥതയും അഴിമതിയും ഉള്ള ഒരു പ്രസ്ഥാനത്തിൽ കൈക്കൂലികഥകൾ വളരെ വേഗത്തിൽ പ്രചരിക്കപ്പെടും. നേതൃത്വത്തിന്റെ വിശ്വാസ്യത നഷ്ടപ്പെട്ട അന്തരീക്ഷത്തിൽ പണാപഹരണത്തിൻ്റെ കഥകൾ ഉണ്ടായിവരും. ആത്മീയമായി അധഃപതിച്ച പ്രസ്ഥാനത്തിൽ ദുർന്നടപ്പിൻ്റെ കഥകൾ സ്വീകാര്യമാകും. കഥകൾ വളരെ വേഗത്തിൽ പ്രചരിക്കയും യുക്തിയുക്തമല്ലെങ്കിൽപ്പോലും സത്യസന്ധമാണെന്നു സാധാരണക്കാർ വിശ്വസിക്കുകയും ചെയ്യും. ആ കഥകൾ ശുശ്രൂഷകരുടെയും വിശ്വാസികളുടെയും വീര്യം കെടുത്തിക്കളയും.
Advertisement
