ദൈവസഭ: ക്രിസ്തുവിനായി വിളിക്കപ്പെട്ട വിശുദ്ധ ജനസമൂഹം

പാസ്റ്റർ ടി.വി. പൗലോസ് കായംകുളം

"ദൈവസഭ" എന്നു പറയുമ്പോൾ ആദ്യം ഓർക്കുന്നത് ഒരു കെട്ടിടമോ ഒരു സ്ഥാപനമോ ആയിരിക്കും. എന്നാൽ തിരുവചനത്തിന്റെ വെളിച്ചത്തിൽ നോക്കുമ്പോൾ ദൈവസഭ കെട്ടിടമല്ല, ക്രിസ്തുവിൽ വിളിക്കപ്പെട്ട വിശ്വാസികളുടെ വിശുദ്ധ കൂട്ടായ്മയാണ്. ദൈവം തന്റെ മഹത്വത്തിനായി ലോകത്തിൽ നിന്നും വേർതിരിച്ചെടുത്ത ജനമാണ് സഭ. അതുകൊണ്ട് സഭയുടെ അടിസ്ഥാനം മനുഷ്യബുദ്ധിയിലോ സംഘടനാ ശക്തിയിലോ അല്ല; യേശുക്രിസ്തുവിന്റെ വീണ്ടെടുപ്പിന്റെ പ്രവൃത്തിയിലാണ്.

1.ദൈവസഭയുടെ ഉത്ഭവം

പുതിയ നിയമത്തിൽ ദൈവസഭയുടെ വ്യക്തമായ ആരംഭം കാണുന്നത് അപ്പോസ്തലന്മാരുടെ പ്രവർത്തികൾ രണ്ടാം അധ്യായത്തിലാണ്. പെന്തെക്കൊസ്ത് ദിനത്തിൽ പരിശുദ്ധാത്മാവ് ഇറങ്ങിയപ്പോൾ ഭയത്താൽ അടഞ്ഞിരുന്ന ഹൃദയങ്ങൾ ധൈര്യത്തോടെ തുറന്നു. പത്രോസ് പ്രസംഗിച്ചപ്പോൾ ആയിരങ്ങൾ മാനസാന്തരം പ്രാപിച്ചു. അവിടെ ജനിച്ചത് ഒരു പുതിയ മതസംഘടനയല്ല; ആത്മാവിൽ ജീവിക്കുന്ന ഒരു സമൂഹമായിരുന്നു.

ആദ്യ സഭയുടെ ജീവിതത്തിൽ നാല് പ്രത്യേകതകൾ ശ്രദ്ധേയമാണ്; അപ്പൊസ്തലിക ഉപദേശത്തിലുള്ള സ്ഥിരത, വിശുദ്ധന്മാരുമായുള്ള കൂട്ടായ്മ, വിശുദ്ധ സംസർഗം, പ്രാർത്ഥന. ഇവയാണ് ഇന്നും സഭയുടെ ആരോഗ്യത്തിന്റെ മാനദണ്ഡങ്ങൾ.

2. ദൈവസഭയുടെ സ്വഭാവം:

സഭയെ തിരുവചനം “ക്രിസ്തുവിന്റെ ശരീരം” എന്നും വിളിക്കുന്നു. എഫസോസിലെ സഭയ്ക്ക് എഴുതിയ ലേഖനത്തിൽ പൗലോസ് പറയുന്നു; ക്രിസ്തു സഭയുടെ തലയും നാം അവന്റെ സഭയാകുന്ന ശരീരത്തിൻ്റെ അവയവങ്ങളുമാണ്. ഓരോ വിശ്വാസിക്കും വ്യത്യസ്ത ദാനങ്ങളും സേവനങ്ങളും ഉണ്ടെങ്കിലും ലക്ഷ്യം ഒന്ന് മാത്രം; ക്രിസ്തുവിന്റെ മഹത്വം.

സഭ ഒരു ആരാധനാസമൂഹം മാത്രമല്ല; അത് സ്നേഹത്തിന്റെ കുടുംബമാണ്. ഒരാളുടെ വേദന മറ്റൊരാൾ അനുഭവിക്കുന്നിടം, ഒരാളുടെ സന്തോഷം എല്ലാവർക്കും സന്തോഷമാകുന്നിടം; അതാണ് യഥാർത്ഥ ദൈവസഭ.

സഭയുടെ ശക്തി ഭംഗിയുള്ള വേദികളിലോ ആകർഷകമായ പരിപാടികളിലോ അല്ല; ആത്മീയ ഐക്യത്തിലും പരിശുദ്ധജീവിതത്തിലും ആണ്.

3. ഇന്നത്തെ സാഹചര്യത്തിൽ ദൈവസഭ

ഇന്ന് ലോകം അതിവേഗം മാറുന്നു. സാങ്കേതികവിദ്യ മനുഷ്യരെ തമ്മിൽ അടുത്ത് കൊണ്ടുവന്നെങ്കിലും ഹൃദയങ്ങളിൽ ദൂരമുണ്ടാക്കി. വ്യക്തികേന്ദ്രിത ചിന്തകളും ആത്മീയ അവഗണനയും വളരുന്ന കാലഘട്ടമാണിത്. ഈ സാഹചര്യത്തിൽ സഭ വെറും ആചാരങ്ങളുടെ കേന്ദ്രമായി മാറാതെ, പ്രത്യാശയുടെ ദീപസ്തംഭമായി നിലകൊള്ളണം.

യുവജനങ്ങൾ ആശയക്കുഴപ്പത്തിലായിരിക്കുമ്പോൾ സഭ മാർഗ്ഗദർശനം നൽകണം. കുടുംബങ്ങൾ തകർന്നുപോകുമ്പോൾ സഭ പ്രാർത്ഥനയുടെ മതിൽ കെട്ടണം. സമൂഹത്തിൽ അനീതിയും ദാരിദ്ര്യവും വർദ്ധിക്കുമ്പോൾ സഭ കരുണയുടെ കൈ നീട്ടണം. ആരാധനയും സേവനവും കൈകോർക്കുമ്പോൾ മാത്രമേ സഭയുടെ സാക്ഷ്യം ശക്തമാകൂ.

4. നാളെയുടെ ദൈവസഭ

ഭാവിയിലെ ദൈവസഭ കെട്ടിടങ്ങൾക്കുള്ളിൽ ഒതുങ്ങുന്ന ഒന്നായിരിക്കരുത്. വീടുകളിൽ കുടുംബപ്രാർത്ഥനയായി, വിദ്യാലയങ്ങളിൽ മൂല്യബോധമായി, ജോലിസ്ഥലങ്ങളിൽ സത്യനിഷ്ഠയായി, സമൂഹത്തിൽ സ്നേഹസേവനമായി; എല്ലായിടത്തും ക്രിസ്തുവിന്റെ സാന്നിധ്യം പ്രകടമാകണം.

സഭ ഒരു നിശ്ചല സ്ഥാപനം അല്ല; അത് ദൈവത്തിന്റെ ചലിക്കുന്ന ദൗത്യമാണ്. കാലം മാറിയാലും സഭയുടെ വിളി മാറുന്നില്ല; “ലോകത്തിന്റെ വെളിച്ചവും ഭൂമിയുടെ ഉപ്പും ആയിരിക്കുക.”

അതിനാൽ ഓരോ വിശ്വാസിയും സ്വയം ചോദിക്കേണ്ട ചോദ്യം ഇതാണ്: ഞാൻ സഭയുടെ ഭാഗം മാത്രമാണോ, അതോ സഭയുടെ സജീവസാക്ഷിയോ?

ക്രിസ്തുവിൽ ഏകതയോടെ, പരിശുദ്ധാത്മാവിന്റെ ശക്തിയിൽ, ദൈവത്തിന്റെ മഹത്വത്തിനായി ജീവിക്കുന്ന സമൂഹമായി ദൈവസഭ തലമുറകളിൽ നിലനിൽക്കട്ടെ.

(പാസ്റ്റർ ടി.വി. പൗലോസ്, അസംബ്ലീസ് ഓഫ് ഗോഡ് മലയാളം ഡിസ്ട്രിക്ട് കൗൺസിൽ മുൻ സെക്രട്ടറിയും, മസ്കറ്റ് ഒ.പി.എ മുൻ ശുശ്രൂഷകനും, ഇപ്പോൾ കായംകുളം സെക്ഷൻ പ്രസ്ബിറ്ററുമാണ്)

Advertisement