സഭാവളർച്ചയ്ക്ക് ഉതകുന്ന ക്ഷേമ പ്രവർത്തനങ്ങൾ നടപ്പിലാക്കും: പാസ്റ്റർ ജോമോൻ ജോസഫ്
ചർച്ച് ഓഫ് ഗോഡ് ഇൻ ഇന്ത്യ കേരള റീജിയൻ ജനറൽ കൺവൻഷൻ ജനു. 20 മുതൽ
തിരുവല്ല: സഭാവളർച്ചയ്ക്ക് ഉതകുന്ന വിവിധ ക്ഷേമ പ്രവർത്തനങ്ങൾ ചർച്ച് ഓഫ് ഗോഡ് ഇൻ ഇന്ത്യ കേരള റീജിയൻ സഭകളിൽ നടപ്പിലാക്കുമെന്ന് സഭാ ഓവർസിയർ പാസ്റ്റർ ജോമോൻ ജോസഫ് പറഞ്ഞു. ജനുവരി 20 തിങ്കൾ മുതൽ 26 ഞായർ വരെ കോട്ടയം, നാട്ടകം പ്രത്യാശ നഗറിൽ (ദൈവസഭ ഗ്രൗണ്ടിൽ) നടക്കുന്ന ചർച്ച് ഓഫ് ഗോഡ് ഇൻ ഇന്ത്യ കേരള റീജിയൻ 102-ാമത് ജനറൽ കൺവെൻഷനോടനുബന്ധിച്ച് നടന്ന പത്ര സമ്മേളനത്തിൽ സംസാരിക്കുകയായിരുന്നു അദ്ദേഹം.
അത്യാധുനിക നിലവാരത്തിലുള്ള ഓഫീസ് സമുച്ചയ നിർമ്മാണ പദ്ധതി, ദൈവദാസന്മാരുടെ ക്ഷേമത്തെ മുൻനിർത്തി റിട്ടയേഡ് ആയ ദൈവദാസന്മാർക്ക് മാസംതോറും ക്ഷേമപെൻഷൻ പദ്ധതി, കർത്തൃസന്നിധിയിൽ ചേർക്കപ്പെട്ട ദൈവദാസന്മാരുടെ സഹധർമ്മിണികൾക്കു പെൻഷൻ, അർഹരായ ദൈവദാസൻമാർക്കുള്ള ചികിത്സ സഹായം നൽകുന്ന പദ്ധതി തുടങ്ങിയവയുടെ ഉത്‌ഘാടനം ജനറൽ കൺവെൻഷനിൽ നടക്കും. കൂടാതെ സെമിത്തേരിയും സഭാ ഹാളും ഇല്ലാത്ത സഭകൾക്ക് നിർമ്മാണ പ്രവർത്തനങ്ങൾക്ക് ആവശ്യമായ സാമ്പത്തികം ഉറപ്പു വരുത്തുക, വാടക കെട്ടിടത്തിൽ പ്രവർത്തിക്കുന്ന സഭകൾക്ക് മുടക്കം കൂടാതെ വാടക നൽകാനുള്ള ക്രമീകരണം ഒരുക്കുക തുടങ്ങിയ പ്രവർത്തനങ്ങളും നടപ്പിലാക്കും.
ദൈവസഭ അഡ്‌മിനിസ്ട്രേറ്റീവ് ബിഷപ്പ് പാസ്റ്റർ ജോമോൻ ജോസഫ് 20-ാം തീയതി തിങ്കളാഴ്‌ച വൈകുന്നേരം 6.30 ന് കൺവൻഷൻ ഉദ്ഘാടനം ചെയ്യും. എജ്യുക്കേഷൻ ഡയറക്‌ടർ പാസ്റ്റർ ജോസഫ് റ്റി. സാം അദ്ധ്യക്ഷത വഹിക്കും. മഹായോഗത്തിൽ വേൾഡ് മിഷൻ സൗത്ത് ഏഷ്യൻ സൂപ്രണ്ട് പാസ്റ്റർ സി.സി. തോമസ് മുഖ്യ അതിഥി ആയിരിക്കും.
പാസ്റ്റർമാരായ ബെൻസൺ മത്തായി, ഷാജി കെ. ഡാനിയേൽ, ഷിബു തോമസ്, ഏബ്രഹാം ടൈറ്റസ്, ടോമി ജോസഫ്, സണ്ണി താഴംപള്ളം, ഏബ്രഹാം തോമസ്, രാജൻ ഏബ്രഹാം, എബി ഏബ്രഹാം, ജെയ്‌സ് പാണ്ടനാട്, അനീഷ് കാവാലം, കെ.ജെ. തോമസ്, വർഗീസ് ഏബ്രഹാം എന്നിവരും ദൈവസഭയിൽ നിന്നുള്ള അനുഗ്രഹീതരായ ദൈവദാസന്മാരും വിവിധ യോഗങ്ങളിൽ പ്രഭാഷണം നടത്തും.
"യേശുവിനെ ശ്രദ്ധിച്ചു നോക്കുവിൻ” എന്നതാണ് കൺവൻഷൻ ചിന്താവിഷയം. കൺവൻഷനോടുബന്ധിച്ച് വിശുദ്ധ ആരാധന, സംഗീത ശുശ്രൂഷ, പൊതുയോഗം, ദൈവവചന പ്രഭാഷണങ്ങൾ, ബൈബിൾ കോളേജ് ഗ്രാജുവേഷൻ, യൂത്ത് ആൻഡ് സൺഡേസ്‌കൂൾ പ്രോഗ്രാം, വനിതാ സമ്മേളനം, സ്നാനശുശ്രൂഷ, സാംസ്‌കാരിക സമ്മേളനം, മിഷനറി കോൺഫറൻസ് എന്നിവയും നടക്കും. ചർച്ച് ഓഫ് ഗോഡ് ക്വയർ ഗാന ശുശ്രൂഷയ്ക്ക് നേതൃത്വം നൽകും. 26-ന് ഞായറാഴ്‌ച നടക്കുന്ന സംയുക്തരാധനയോടും തിരുവത്താഴ ശുശ്രൂഷയോടും കൂടെ കൺവൻഷൻ സമാപിക്കും.
തിരുവല്ലയിൽ നടന്ന പത്രസമ്മേളനത്തിൽ പാസ്റ്റർമാരായ വി.പി.ഫിലിപ്പ്, ജോമോൻ മാത്യു, ജെബു ജോൺസൻ, പി.ജി. പ്രസാദ്, ജിൻസൺ ടി. ജോസ് എന്നിവർ പങ്കെടുത്തു.
Advertisement
