സ്നേഹം കൊണ്ട് കരുതലൊരുക്കി; ആരുമില്ലാത്തവർക്ക് താങ്ങായി കിളിമാനൂർ വിമൻസ് ഫെലോഷിപ്പിന്റെ സ്നേഹസ്പർശം
കിളിമാനൂർ: എല്ലാവരും സ്വന്തം കാര്യങ്ങളിലേക്ക് മാത്രം ചുരുങ്ങുന്ന ഇക്കാലത്ത്, ആരുമില്ലാത്തവർക്ക് താങ്ങും തണലുമാകാൻ കിളിമാനൂരിൽ നിന്നും അവർ എത്തിയപ്പോൾ പിറന്നത് കരളലിയിക്കുന്ന അനുഭവ നിമിഷങ്ങൾ. ഐപിസി കിളിമാനൂർ സെന്റർ വിമൻസ് ഫെലോഷിപ്പിലെ അംഗങ്ങളും കുടുംബാംഗങ്ങളും ചേർന്ന് തിരുവനന്തപുരം മർതൃമ്മലയിലെ 'സ്നേഹതീരം' ചാരിറ്റബിൾ സൊസൈറ്റി സന്ദർശിച്ചതാണ് പ്രദേശവാസികളുടെയും സമൂഹത്തിന്റെയും ശ്രദ്ധയാകർഷിക്കുന്നത്.
സമൂഹത്തിൽ ഒറ്റപ്പെട്ടുപോയ, മാനസിക വെല്ലുവിളികൾ നേരിടുന്ന നിരപരാധികളായ സ്ത്രീകൾക്ക് തലചായ്ക്കാൻ ഒരിടവും വിശപ്പടക്കാൻ ആഹാരവും നൽകി അവരെ ജീവിതത്തിന്റെ വെളിച്ചത്തിലേക്ക് നയിക്കുന്ന 'സ്നേഹതീര'ത്തിന്റെ തിരുമുറ്റത്തേക്ക് സ്നേഹത്തിന്റെയും കരുണയുടെയും സന്ദേശവുമായാണ് ഈ സംഘം എത്തിയത്.
അന്തേവാസികളുടെ പ്രയാസങ്ങളും ജീവിതകഥകളും നേരിട്ടറിഞ്ഞ സന്ദർശകർ, തങ്ങളുടെ പ്രിയപ്പെട്ടവരോടൊപ്പം കുറച്ചു സമയം ചിലവഴിക്കുകയും സന്തോഷം പങ്കിടുകയും ചെയ്തു. കണ്ണീരും പുഞ്ചിരിയും ഒന്നായ ഈ നിമിഷങ്ങൾ അവിടെയുണ്ടായിരുന്ന ഏവരുടെയും ഉള്ളുലയ്ക്കുന്ന ഒന്നായിരുന്നു. വെറുമൊരു സന്ദർശനത്തിനപ്പുറം, പാർശ്വവൽക്കരിക്കപ്പെട്ട മനുഷ്യർക്ക് പ്രത്യാശ നൽകുന്ന വലിയൊരു സന്ദേശമാണ് ഈ കൂട്ടായ്മ സമൂഹത്തിന് നൽകിയത്. ഇത്തരം വലിയ മനുഷ്യസ്നേഹ മാതൃകകൾക്ക് ദൈവത്തിന് നന്ദി അർപ്പിച്ചുകൊണ്ടാണ് സംഘം മടങ്ങിയത്. സ്പോൺസർ മിനിസ്റ്റർ സജി വർഗീസ്, സോദരി സമാജം പ്രവർത്തക ബീന വർഗീസ് എന്നിവരുടെ ഉത്സാഹത്തിലാണ് 'സ്നേഹതീര'ത്തിൽ കരുതലിൻ്റെ സ്നേഹകൂട്ടയ്മ ഒരുക്കിയത്.
ഐപിസി കിളിമാനൂർ സെന്റർ വിമൻസ് ഫെലോഷിപ്പ് അംഗങ്ങളുടെയും കുടുംബാംഗങ്ങളുടെയും നേതൃത്വത്തിൽ തിരുവനന്തപുരം മർതൃമ്മലയിൽ പ്രവർത്തിക്കുന്ന 'സ്നേഹതീരം' ചാരിറ്റബിൾ സൊസൈറ്റി സന്ദർശിച്ചു. മാനസിക വെല്ലുവിളികൾ നേരിടുന്നവർക്കും നിരാലംബരായ സ്ത്രീകൾക്കും സംരക്ഷണവും ഭക്ഷണവും തൊഴിൽ പരിശീലനവും നൽകി സമൂഹത്തിന്റെ മുഖ്യധാരയിലേക്ക് എത്തിക്കുന്ന സ്ഥാപനത്തിലെ അന്തേവാസികൾക്കൊപ്പം സ്നേഹവും സൗഹൃദവും പങ്കുവെക്കാനാണ് സംഘമെത്തിയത്. ചാരിറ്റബിൾ സൊസൈറ്റിയുടെ പ്രവർത്തനങ്ങൾ നേരിട്ടറിയാനും അന്തേവാസികളോടൊപ്പം സമയം ചെലവഴിക്കാനും കഴിഞ്ഞത് ഹൃദയസ്പർശിയായ അനുഭവമായി മാറിയെന്ന് ഭാരവാഹികൾ പറഞ്ഞു. ചടങ്ങിൽ ഫെലോഷിപ്പ് അംഗങ്ങളും കുടുംബാംഗങ്ങളും പങ്കെടുത്തു.
