യേശുക്രിസ്തുവിന്റെ വിശ്വസ്ത സാക്ഷിയാകാം | റീചാർജ്ജ് ടുഡേ 

റീചാർജ് ടുഡേ-6

യേശുക്രിസ്തുവിന്റെ വിശ്വസ്ത സാക്ഷിയാകാം 

പാസ്റ്റർ വി. പി. ഫിലിപ്പ് 

ധ്യാന ഭാഗം: വെളിപ്പാട് പുസ്തകം അധ്യായം 1

"യോഹന്നാൻ ആസ്യയിലെ ഏഴു സഭകൾക്കും എഴുതുന്നതു: ഇരിക്കുന്നവനും ഇരുന്നവനും വരുന്നവനുമായവങ്കൽനിന്നും അവന്റെ സിംഹാസനത്തിന്മുമ്പിലുള്ള ഏഴു ആത്മാക്കളുടെ പക്കൽനിന്നും വിശ്വസ്തസാക്ഷിയും മരിച്ചവരിൽ ആദ്യജാതനും ഭൂരാജാക്കന്മാർക്കു അധിപതിയും ആയ യേശുക്രിസ്തുവിങ്കൽനിന്നും നിങ്ങൾക്കു കൃപയും സമാധാനവും ഉണ്ടാകട്ടെ" ( വെളിപ്പാട് 1: 4,5).

വെളിപ്പാട് പുസ്തക പഠനവും ധ്യാനവും നമ്മെ യേശുക്രിസ്തുവിലേക്കു കൂടുതൽ അടുപ്പിക്കും. ഒന്നാം അദ്ധ്യായത്തിൽ യേശുക്രിസ്തുവിന്റെ ഒൻപതു വ്യത്യസ്തമായ പേരുകൾ കാണാം. വെളിപ്പാട് 1:5-ൽ യേശുക്രിസ്തുവിനെ “വിശ്വസ്ത സാക്ഷി” എന്നു വിളിക്കുന്നത് ആഴമുള്ള ക്രിസ്തുശാസ്ത്രപരമായ അർത്ഥമുള്ള ഒരു ശീർഷകമാണ്. ഇവിടെ ഉപയോഗിച്ചിരിക്കുന്ന 'മാർട്ടസ്'എന്ന ഗ്രീക്ക് പദം സാക്ഷ്യം മാത്രമല്ല, സാക്ഷ്യത്തിനായി ജീവൻ നല്കുന്ന രക്തസാക്ഷിത്വവും സൂചിപ്പിക്കുന്നു. യേശു എപ്പോഴും സത്യം സംസാരിക്കയും സത്യത്തെ പ്രതിനിധീകരിക്കയും ചെയ്തു.

പീഡനം അനുഭവിച്ചിരുന്ന സഭകളുടെ പശ്ചാത്തലത്തിൽ, വിശ്വസ്ത സാക്ഷി എന്നത് ക്രിസ്തുവിന്റെ സാക്ഷ്യം അന്തിമവും വിശ്വാസയോഗ്യവുമാണെന്നും, സഭയുടെ വിശ്വസ്ത സാക്ഷ്യജീവിതത്തിന് അവൻ തന്നെയാണ് മാതൃകയെന്നും പ്രഖ്യാപിക്കുന്നു.

 ലോകമെമ്പാടും ക്രൈസ്തവ സഭ പീഡനത്തിലൂടെ കടന്നുപോകുന്നു. എല്ലാകാലത്തും സഭ പീഡനത്തിലൂടെ യാത്രചെയ്തിട്ടുണ്ട്. പതിനായിരക്കണക്കിന് രക്തസാക്ഷികൾ യേശുക്രിസ്തുവിനുവേണ്ടി വിശ്വസ്ത സാക്ഷികളായി തീർന്നിട്ടുണ്ട്. നമ്മുടെ വ്യക്തിപരമായ ജീവിതവും യേശുക്രിസ്തുവിന്റെ നാമത്തിനു സാക്ഷ്യം പറയാൻ സമർപ്പിക്കാം. ജീവിതാന്ത്യം വരെ ക്രൂശിന്റെ രക്ഷാസന്ദേശം വഹിക്കാം. 

അപ്പോസ്തോലനായ പൗലോസിന്റെ ആഗ്രഹവും സമർപ്പണവും നമ്മുടേതും കൂടെയാകട്ടെ. "ഇപ്പോൾ ഇതാ ഞാൻ ആത്മാവിനാൽ ബന്ധിക്കപ്പെട്ടവനായി യെരൂശലേമിലേക്കു പോകുന്നു. ബന്ധനങ്ങളും കഷ്ടങ്ങളും എനിക്കായി കാത്തിരിക്കുന്നു എന്നു പരിശുദ്ധാത്മാവു പട്ടണംതോറും സാക്ഷ്യം പറയുന്നതല്ലാതെ അവിടെ എനിക്കു നേരിടുവാനുള്ള ഒന്നും ഞാൻ അറിയുന്നില്ല. എങ്കിലും ഞാൻ എന്റെ പ്രാണനെ വിലയേറിയതായി എണ്ണുന്നില്ല; എന്റെ ഓട്ടവും ദൈവകൃപയുടെ സുവിശേഷത്തിന്നു സാക്ഷ്യം പറയേണ്ടതിന്നു കർത്താവായ യേശുതന്ന ശുശ്രൂഷയും തികെക്കേണം എന്നേ എനിക്കുള്ളു" (അപ്പോസ്തോല പ്രവൃത്തികൾ 20:22-24). ഈ വാക്യങ്ങൾ ക്രസ്തുയേശുവിന്റെ വിശ്വസ്ത സാക്ഷിയാകാൻ നമുക്കു മാതൃകയും പ്രേരണയുമാകട്ടെ.

സമർപ്പണ പ്രാർത്ഥന: പിതാവേ, അവിടുത്തെ പുത്രനായ യേശുക്രിസ്തു വിശ്വസ്ത സാക്ഷിയായതുപോലെ ഞങ്ങളുടെയും ജീവിതം ആ സാക്ഷ്യത്തിന്റെ കഷ്ടതയും മഹത്വവും വഹിക്കാൻ ഇടയാക്കണമേ. ആമേൻ.

റീചാർജ് ടുഡേ 5

കൂരിരുൾ താഴ്‌വരയും നിറഞ്ഞു കവിയുന്ന പാനപാത്രവും

പാസ്റ്റർ വി. പി. ഫിലിപ്പ് 

ധ്യാനഭാഗം: സങ്കീർത്തനം 23.
"കൂരിരുൾ താഴ്‌വരയിൽകൂടി നടന്നാലും ഞാൻ ഒരു അനർത്ഥവും ഭയപ്പെടുകയില്ല; നീ എന്നോടുകൂടെ ഇരിക്കുന്നുവല്ലോ; നിന്റെ വടിയും കോലും എന്നെ ആശ്വസിപ്പിക്കുന്നു.
എന്റെ ശത്രുക്കൾ കാൺകെ നീ എനിക്കു വിരുന്നൊരുക്കുന്നു; എന്റെ തലയെ എണ്ണകൊണ്ടു അഭിഷേകംചെയ്യുന്നു; എന്റെ പാനപാത്രവും നിറഞ്ഞു കവിയുന്നു" ( സങ്കീർത്തനം: 23: 4,5).

ഇരുപത്തിമൂന്നാം സങ്കീർത്തനം ദൈവമക്കളെ മാത്രമല്ല എല്ലാ തലത്തിലുമുള്ള ജന സമൂഹത്തെ സ്വാധീനിച്ചിട്ടുണ്ട്. ഇടയ സങ്കീർത്തനക്കാരനായ ദാവീദിന്റെ ഈ സങ്കീർത്തനം ആരേയും സ്പർശിക്കും. നനവുള്ള ഹൃദയത്തെ ഉണർത്തും. അതിജീവിക്കുവാൻ ഉണർവ്വും ആവേശവും നൽകും. കാവ്യ സൗന്ദര്യത്തോടൊപ്പം ഒരു നല്ല ഇടയെന്റെ തൂവൽ സ്പർശം ഈ സങ്കീർത്തനം വായിക്കുമ്പോൾ നാം അനുഭവിക്കുന്നു.
നിറവ് മുകളിൽ നിന്നും
എന്റെ പാനപാത്രവും നിറഞ്ഞു കവിയുന്നു എന്ന് ഭക്തൻ പാടുമ്പോൾ പാനപാത്രത്തിനകത്തേക്ക് ഒരു ഒഴുക്ക് ഉണ്ടാകണമല്ലോ? ആ നിറവ് മുകളിൽ നിന്നാണ്. മനുഷ്യന് സ്വയം നിറയുവാൻ കഴിയുകയില്ല. ദൈവം നൽകുന്ന നിറവാണ് യഥാർത്ഥ നിറവ്. ആ നിറവിന് സംതൃപ്തിയും പുറത്തേക്ക് ഒഴുകുവാനുള്ള സാധ്യതയും ഉണ്ട്. ദൈവം നമുക്ക് നൽകുന്ന അനുഗ്രഹങ്ങൾ നമ്മിൽ മാത്രം സ്വരൂപിച്ച് വെക്കുവാനല്ല അത് മറ്റുള്ളവരിലേക്ക് ഒഴുകപ്പെടണം. അബ്രാമിനെ ദൈവം അനുഗ്രഹിക്കുമ്പോൾ 'നിന്നെ അനുഗ്രഹിച്ച് നിന്റെ പേർ വലുതാക്കും. നീ ഒരു അനുഗ്രഹമായിരിക്കും' (ഉൽപ്പത്തി. 12:2) എന്നാണ് പറയുന്നത്. യഥാർത്ഥ അനുഗ്രഹം മറ്റുള്ളവരിലേക്ക് പകരപ്പെടുന്ന അനുഭമാണ്. യഥാർത്ഥ നിറവും മറ്റുള്ളവരിലേക്ക് പങ്ക് വെയ്ക്കുന്ന നിറവാണ്. ഉയരത്തിൽ നിന്ന് ദൈവം നിറയ്ക്കുമ്പോഴാണ് നിറഞ്ഞു കവിയുന്നത്. സ്വയം നിറഞ്ഞു കവിയുവാൻ നമുക്ക് കഴിയുകയില്ല. ഉയരത്തിൽ നിന്നുള്ള ഉറവിനായി നമുക്ക് കാത്തിരിക്കാം.

ആരുടെ പാനപാത്രം നിറഞ്ഞു കവിയുന്നു?
"എന്റെ പാനപാത്രവും നിറഞ്ഞു കവിയുന്നു" എന്ന് ദാവീദ് പാടുമ്പോൾ യഹോവ ഇടയൻ ആയവന്റെ പാനപാത്രം നിറഞ്ഞു കവിയുന്നു. എന്നാണ് അതിനർത്ഥം. പട്ടിണിയും പരിമിതികളും ഇല്ലാഞ്ഞിട്ടല്ല, ഞെരുക്കമുണ്ടാകുന്ന സമയങ്ങളിലും സമൃദ്ധിയായി നയിക്കുന്ന ഒരു നല്ല ഇടയനാണ് ദൈവം. യേശു പറയുന്നു 'ഞാൻ നല്ല ഇടയനാകുന്നു; നല്ല ഇടയൻ ആടുകൾക്ക് വേണ്ടി തന്റെ ജീവനെ കൊടുക്കുന്നു' (യോഹ. 10:11). ആടുകൾക്കുവേണ്ടി സമൃദ്ധിയായ ജീവൻ നൽകുന്നവനാണ് യേശുകർത്താവ്.
കൂരിരുൾ താഴ്‌വരയിലൂടെ നടന്നവരുടെ പാനപാത്രം നിറഞ്ഞു കവിയുന്നു.
ഈ ജീവിത യാത്ര എന്നും പച്ചയായ പുൽപുറവും സ്വസ്ഥതയുള്ള വെള്ളവും നിറഞ്ഞിരിക്കുന്നതല്ല. കൂരിരുളും താഴ്‌വരകളും ഉണ്ട്. മരണ നിഴലിൽ കൂടെ നടക്കുന്ന നിമിഷങ്ങളുമുണ്ട്. അപ്പോഴും ദൈവാശ്രയം കൈവിടരുത്. അവർക്ക് പറയുവാൻ കഴിയും എന്റെ പാനപാത്രവും നിറഞ്ഞു കവിയുന്നു.

ദരിദ്രരുടെയും വിധവമാരുടെയും പാനപാത്രം നിറഞ്ഞു കവിയുന്നു. 
1 രാജാക്കൻമാർ അദ്ധ്യായം 17 ൽ സാരേഫാത്തിലെ ദരിദ്രയായ വിധവയെക്കുറിച്ചും ഏലിയാവിലൂടെ ദൈവം ചെയ്ത അത്ഭുതവും വായിക്കുന്നു. അവരുടെ കലത്തിലെ മാവ് തീർന്നു പോയില്ല, ഭരണിയിലെ എണ്ണയും കുറഞ്ഞു പോയില്ല. ഭൂമിയിൽ മഴ പെയ്യാതിരുന്നപ്പോൾ അവൾക്കും അവളുടെ വീട്ടുകാർക്കും അപ്പം ദൈവം കൊടുത്തുകൊണ്ടേയിരുന്നു. ദരിദ്രരോടും വിധവമാരോടും അനാഥരോടും കരുണയുള്ളവനാണ് നമ്മുടെ നല്ല ഇടയൻ. ഒട്ടിയ കണ്ണുകളിൽ നിന്ന് ഉപ്പുരസമുളള കണ്ണുനീർ തുള്ളികൾ പുറത്തു വന്നാലും പാനപാത്രം വറ്റിപോകുവാൻ ദൈവം അനുവദിക്കുകയില്ല.

കടഭാരമുള്ളവരുടെ എണ്ണപാത്രവും നിറഞ്ഞു കവിയുന്നു.
2 രാജക്കാൻമാർ അദ്ധ്യായം നാലിൽ പ്രവാചക ശിഷ്യന്റെ ഭാര്യ, കടഭാരമുള്ള വിധവ ഏലിശയുടെ അരികിൽ എത്തുന്നു. ഏലിശയുടെ ചോദ്യം 'വീട്ടിൽ നിനക്ക് എന്തുള്ളൂ?' 'ഒരു ഭരണി എണ്ണയല്ലാതെ മറ്റൊന്നുമില്ല' എന്നായിരുന്നു അവളുടെ മറുപടി. അടുത്ത വീടുകളിൽ നിന്നും വെറും പാത്രങ്ങൾ വായ്പ്പ വാങ്ങുവാൻ പ്രവാചകൻ നിർദ്ദേശിക്കുന്നു. പ്രവാചകൻ പറഞ്ഞതനുസരിച്ച് പാത്രങ്ങൾ വായ്പ്പ വാങ്ങി മക്കൾക്കൊപ്പം മുറിക്കകത്തു കടന്ന് ആ വിധവ വാതിൽ അടച്ചു. അവിടെ സംഭവിച്ചത് വലിയൊരു നിറവായിരുന്നു. അവൾ പകരുകയും പാത്രങ്ങൾ നിറയുകയും ചെയ്തു. തെളിവുള്ള എണ്ണ വിറ്റ് അവൾ കടം വീട്ടി. കടഭാരമുള്ള വിധവയുടെ എണ്ണപാത്രങ്ങൾ നിറഞ്ഞു കവിഞ്ഞു.
ഇന്നിന്റെ ആവശ്യം ഒരു നിറവാണ്. ഹൃദയത്തിൽ നന്മയുടെ നിറവുണ്ടാകണം. നാവിൽ തുമ്പിൽ നിന്ന് പുറത്തേക്ക് വരേണ്ടത് നന്മയുടെ വാക്കുകളായിരിക്കണം. 'എന്റെ ഹൃദയം ശുഭവചനത്താൽ കവിയുന്നു; എന്റെ കൃതി രാജാവിനുവേണ്ടിയുള്ളത് എന്ന് ഞാൻ പറയുന്നു. എന്റെ നാവ് സമർത്ഥനായ ലേഖകന്റെ എഴുത്തുകോൽ ആകുന്നു' (സങ്കീ. 45:1). ദൈവത്തെ കണ്ടവന്റെ ഹൃദയം ശുഭവചനത്താൽ നിറയും. വാമൊഴിയായും വരമൊഴിയായും പങ്കുവെയ്ക്കുന്നത് ശുഭ വചനങ്ങളായിരിക്കും.

നാല് തരം നിറവുകൾ ഉണ്ട്; 1. വചനത്തിന്റെ നിറവ്, 2. പരിശുദ്ധാത്മാവിന്റെ നിറവ്, 
3. ക്രിസ്തുവിന്റെ നിറവ്, 4. ആത്മഭാരംകൊണ്ടുള്ള നിറവ്
ഈ നാലു നിറവുകളും വ്യക്തിപരമായി അനുഭവിക്കുകയും അത് മറ്റുള്ളവരിലേക്ക് പകരപ്പെടുവാൻ അനുവദിക്കുകയും ചെയ്യുക. 

യേശുക്രിസ്തു പറഞ്ഞ നിറവ്
'ഉത്സവത്തിന്റെ മഹാദിനമായ ഒടുക്കത്തെ നാളിൽ യേശു നിന്നുകൊണ്ട് ദാഹിക്കുന്നവൻ എല്ലാം എന്റെ അടുക്കൽ വന്ന് കുടിക്കട്ടെ. എന്നിൽ വിശ്വസിക്കുന്നവന്റെ ഉള്ളിൽ നിന്ന് തിരുവെഴുത്ത് പറയുന്നതുപോലെ ജീവജലത്തിന്റെ നദികൾ ഒഴുകും എന്ന് വിളിച്ചു പറഞ്ഞു. അവൻ ഇത് തന്നിൽ വിശ്വസിക്കുന്നവർക്ക് ലഭിപ്പാനുള്ള ആത്മാവിനെക്കുറിച്ച് ആകുന്നു പറഞ്ഞത്; യേശു അന്ന് തേജസ്സക്കരിക്കപ്പെട്ടിട്ടില്ലായിരിക്കയാൽ ആത്മാവ് വന്നിട്ടില്ലായിരുന്നു' (യോഹ. 7:37-39). യേശു പറഞ്ഞ പരിശുദ്ധാത്മാവിന്റെ നിറവ് പെന്തെക്കോസ്തു നാളിൽ 120 പേർ അനുഭവിച്ചു. അവർ അന്യഭാഷകളിൽ സംസാരിച്ചു തുടങ്ങി (അപ്പോ. പ്രവൃത്തി. 2:4). നാം ജീവിക്കുന്ന പരിശുദ്ധാത്മ യുഗത്തിൽ പരിശുദ്ധാത്മാവിന്റെ നിറവും നിയന്ത്രണവും അനുഭവിക്കാം.

സമർപ്പണ പ്രാർത്ഥന:
പിതാവേ, കൂരിരുളിന്റെ താഴ്‌വരയിലും എന്റെ പാനപാത്രവും നിറഞ്ഞു കവിയുന്നു എന്ന് പാടുവാൻ അങ്ങ് കൃപ തരണെ. സ്‌നേഹം കൊണ്ട് ഹൃദയം നിറയുവാനും പരിശുദ്ധാത്മ നിറവുള്ള ജീവിതം നയിക്കാനും ഞങ്ങളെ സഹായിക്കേണമേ. ആമേൻ

റീചാർജ് ടുഡേ-4

ദൈവസാന്നിധ്യമുള്ള കൂടാരങ്ങൾ തഴയ്ക്കുന്നു

പാസ്റ്റർ വി.പി. ഫിലിപ്പ്

വായനഭാഗം: സദൃശ്യവാക്യങ്ങൾ 14

"ദുഷ്ടന്മാരുടെ വീടു മുടിഞ്ഞുപോകും; നീതിമാന്റെ കൂടാരമോ തഴെക്കും." (സദൃശ്യ. 14:11)

നമ്മുടെ കുടുംബങ്ങളുടെ ഇന്നിന്റെ അടിയന്തര ആവശ്യം ദൈവസാന്നിധ്യമാണ്. ഡോ. ബില്ലി ഗ്രഹാം പറയുന്നത് ശ്രദ്ധിയ്ക്കുക; “നമ്മുടെ കുടുംബജീവിതത്തിന്റെ കേന്ദ്രസ്ഥാനത്ത് ദൈവത്തെ പ്രതിഷ്ഠിക്കണം. ഒരു കുടുംബമെന്ന നിലയിൽ നാം ഓരോ ദിവസവും ദൈവത്തോടൊപ്പം നടക്കുകയും വേണം.”

ലോകത്തിൽ തകരുന്ന കുടുംബങ്ങളും തഴെക്കുന്ന കുടുംബങ്ങളും ഉണ്ട്. ദുഷ്ടന്റെ വീടു തകരും. നീതിമാന്റെ കുടുംബം തഴെക്കും. സഭയിലും സമൂഹത്തിലും തഴെക്കുന്ന കൂടാരങ്ങളാണ് ഇന്നിന്റെ അനിവാര്യത. നീതിമാന്റെ കൂടാരങ്ങൾ എങ്ങനെയാണ് തഴെക്കപ്പെടുന്നത്? 
(1) ദൈവത്തിന്റെ സാന്നിദ്ധ്യവും അനുഗ്രഹവും ഉണ്ടെങ്കിൽ മാത്രമെ നമ്മുടെ ഭവനങ്ങൾക്ക് അഭിവൃദ്ധി ഉണ്ടാകുകയുള്ളൂ. “നീതിമാൻമാരുടെ വാസസ്ഥലത്തെയൊ അവൻ അനുഗ്രഹിക്കുന്നു” (സദൃശ്യ: 3:33) ദൈവത്തിന്റെ പ്രസാദത്താൽ ഉണ്ടാകുന്ന അനുഗ്രഹം മാത്രമാണ് നമ്മുടെ കൂടാരങ്ങളെ ധന്യമാക്കുന്നത്.
(2) “അവന്റെ കാലത്ത് നീതിമാൻമാർ തഴെക്കട്ടെ; ചന്ദ്രനുള്ളടത്തോളം സമാധാന സമൃദ്ധി ഉണ്ടാകട്ടെ” (സങ്കീ. 72:7) എന്ന വചനം ഇവിടെ ശ്രദ്ധേയമാണ്. ദൈവ ഭയമുള്ള ദൈവജനത്തോടു ന്യായം കാണിക്കുന്ന രാജാക്കന്മാർ (ഭരണാധികാരികൾ) ഉള്ള കാലത്ത് നീതിമാൻന്മാരുടെ കൂടാരങ്ങൾ തഴെക്കും.
(3) കുടുംബാംഗങ്ങളുടെ ഹൃദയ വിചാരങ്ങളും പുറത്തു വരുന്ന വാക്കുകളും ദൈവത്തിനു പ്രസാദമാകുമ്പോൾ തങ്ങളുടെ കൂടാരങ്ങൾ നിലനിൽക്കയും തഴെക്കയും ചെയ്യും. “നീതിമാൻമാരുടെ വിചാരങ്ങൾ ന്യായം; ദുഷ്ടൻമാരുടെ നിരൂപണങ്ങൾ ചതിവത്രെ. ദുഷ്ടൻമാർ പ്രാണഹാനി വരുത്തുവാൻ പറഞ്ഞൊക്കുന്നു; നേരുള്ളവരുടെ വാക്കോ അവരെ വിടുവിക്കുന്നു. ദുഷ്ടന്മാർ മറിഞ്ഞു വീണു ഇല്ലാതെയാകും; നീതിമാൻമാരുടെ ഭവനമോ നിലനിൽക്കും” (സദൃശ്യ. 12:5-7)
ദൈവസാന്നിദ്ധ്യം കൊണ്ടും വചനംകൊണ്ടും ദൂതന്മാരുടെ കാവൽകൊണ്ടും തഴക്കപ്പെടുവാൻ നമ്മുടെ ഭവനങ്ങൾക്ക് കഴിയട്ടെ. പിശാചിന്റെ ആയുധശേഖരമായോ, അവന്റെ ഉല്പന്നങ്ങൾ വിൽക്കപ്പെടുന്ന സ്ഥലമായോ നമ്മുടെ വീടുകൾ മാറരുത്. ദൈവം നല്കാത്തതും ദൈവത്തിനു ഇഷ്ടമില്ലാത്തതും ഒന്നുംതന്നെ നമ്മുടെ ഭവനങ്ങളിൽ ഉണ്ടാകരുത്. നമ്മുടെ ഭവനങ്ങൾ സന്ദർശിക്കുന്നവരും ദൈവത്തിന്റെ തിരുസാന്നിദ്ധ്യം നമ്മുടെ ഭവനങ്ങളിൽ അനുഭവിക്കട്ടെ.
സമർപ്പണ പ്രാർത്ഥന
വീടു പണിയുന്ന സ്വർഗ്ഗസ്ഥനായ പിതാവെ, അടിയന്റെ കൂടാരം തിരുമുമ്പിൽ തഴെക്കുവാൻ പ്രസാദം തോന്നേണമെ. അങ്ങ് ആഗ്രഹിക്കുന്നതു മാത്രം അടിയന്റെ ഭവത്തിൽ ഉണ്ടാകുവാൻ സഹായിക്കണെ. നീതിയുടെയും ധർമ്മത്തിന്റെയും മനോഹര കൂടാരത്തിൽ വസിക്കുവാൻ എന്നെ സഹായിക്കേണമേ. ആമെൻ.

റീചാർജ് ടുഡേ- 3 

ആശ്വാസകാലങ്ങൾ ആവർത്തിയ്ക്കപ്പടുവാൻ...

പാസ്റ്റർ വി. പി. ഫിലിപ്പ് 

വായനാഭാഗം: അപ്പൊ. പ്രവൃത്തികൾ 3
"ആകയാൽ നിങ്ങളുടെ പാപങ്ങൾ മാഞ്ഞുകിട്ടേണ്ടതിന് മാനസാന്തരപ്പെട്ട് തിരിഞ്ഞുകൊൾവിൻ, എന്നാൽ കർത്താവിന്റെ സമ്മുഖത്തുനിന്ന് ആശ്വസകാലങ്ങൾ വരികയും നിങ്ങൾക്ക് മുൻ നിയമിക്കപ്പെട്ട ക്രിസ്തുവായ യേശുവിനെ അവൻ അയക്കുകയും ചെയ്യും" (3:19,20)

വിശുദ്ധ പത്രോസിന്റെ പ്രസംഗങ്ങൾ അപ്പൊ. പ്രവൃത്തികളുടെ പുസ്തകത്തിൽ രേഖപ്പെടുത്തിയിരിക്കുന്നത് ശ്രദ്ധേയമാണ്. രണ്ടാം അദ്ധ്യായം 17 മുതൽ ഉള്ള വാക്യങ്ങളിൽ ഒന്നാമത്തെ പ്രസംഗവും മൂന്നാം അദ്ധ്യായം 12 മുതലുളള വാക്യങ്ങളിൽ രണ്ടാമത്തെ പ്രസംഗവും രേഖപ്പെടുത്തിയിരിക്കുന്നു. ഇവ കൂടാതെ പത്രോസിന്റെ മറ്റു പ്രസംഗങ്ങളും കാണാം. മുകളിൽ രേഖപ്പെടുത്തിയിരിക്കുന്ന വാക്യം രണ്ടാമത്തെ പ്രസംഗത്തിൽ നിന്നാണ് ഉദ്ധരിച്ചിരിക്കുന്നത്.
രണ്ട് പ്രധാന നിർദ്ദേശങ്ങൾ പത്രോസ് ഇവിടെ നൽകുന്നു; (1) പാപങ്ങൾ മാഞ്ഞു കിട്ടേണ്ടതിന് മാനസാന്തരപ്പെടുക. (2) ദൈവത്തിങ്കലേക്ക് തിരിഞ്ഞുകൊൾക.
ഈ നിർദ്ദേശങ്ങൾ അനുസരിച്ചാൽ രണ്ട് പ്രധാനപ്പെട്ട വാഗ്ദത്തങ്ങൾ ലഭ്യമാകുമെന്ന് ഉറപ്പു നൽകുന്നു. (1) പാപങ്ങൾ മാഞ്ഞുകിട്ടും (2) കർത്താവിന്റെ സമ്മുഖത്തു നിന്ന് ആശ്വാസ കാലങ്ങൾ വരും. 'കർത്താവിന്റെ സന്മുഖത്തുനിന്ന്' എന്ന് ഉദ്ദേശിക്കുന്നത് രണ്ട് അർത്ഥങ്ങളിൽ മനസ്സിലാക്കാം (1) ആശ്വാസ കാലങ്ങൾ കർത്താവിങ്കൽ നിന്നു വരുന്നു. (2) ആശ്വാസകാലങ്ങൾ കർത്താവിന്റെ സന്നിധിയിൽ നിന്നു വരുന്നു. 

ദുരിതങ്ങളുടെയും ദുരന്തങ്ങളുടെയും കാലത്തു ആശ്വാസം നൽകുവാൻ ഒരുവനു മാത്രമേ കഴിയുകയുള്ളൂ; അത് കർത്താവായ യേശുക്രിസ്തുവിനാണ്. നമുക്ക് ആശ്വാസം നൽകുമെന്ന് പ്രതീക്ഷിക്കുന്നവർ ആശ്വാസത്തിനു പകരം വേദനകൾ ആയിരിക്കാം നൽകുന്നത്. എന്നാൽ ആശ്വാസത്തിനുവേണ്ടി ഉറപ്പോടെ നോക്കുവാൻ കർത്താവായ യേശുക്രിസ്തു മാത്രമേ ഉള്ളൂ. അവന്റെ അരികെ വന്നവർക്കെല്ലാം ആശ്വാസം ലഭിച്ചിട്ടുണ്ട്. “അദ്ധ്വാനിക്കുന്നവരും ഭാരം ചുമക്കുന്നവരും ആയുള്ളോരേ എല്ലാവരും എന്റെ അടുക്കൽ വരുവിൻ. ഞാൻ നിങ്ങളെ ആശ്വാസിപ്പിക്കും” (മത്തായി. 11:28) എന്ന് യേശുക്രിസ്തു അരുളിചെയ്തു കേൾക്കുമ്പോൾ തന്നെ മനസ്സിൽ ദിവ്യ ആശ്വാസത്തിന്റെ തണുപ്പ് അനുഭവിക്കും.
ഈ ആശ്വാസം നമുക്ക് നിത്യമായി അനുഭവിക്കണം എങ്കിൽ ആദ്യം പറയുന്ന രണ്ട് നിർദ്ദേശങ്ങൾ സമർപ്പണത്തോടെ അനുസരിച്ചേ മതിയാകുകയുള്ളൂ. മാനസാന്തരവും ദൈവത്തിങ്കലേക്ക് തിരിയുന്നതുമായ രണ്ട് അനുഭവങ്ങൾ ആശ്വാസകാലങ്ങൾ ലഭ്യമാകുവാൻ നമ്മിൽ അടിത്തറ പാകുകയാണ്.

കർത്താവിന്റെ സന്നിധിയിൽ വസിക്കുമ്പോഴാണ് അവിടുന്ന് തരുന്ന ആശ്വാസം അനുഭവിക്കുവാൻ കഴിയുന്നത്. മിഷണറി യാത്രാ മദ്ധ്യേ വൈഷമ്യങ്ങൾ നേരിടുകയും ചിലപ്പോൾ ഏകനായി സഞ്ചരിക്കുകയും ചെയ്യേണ്ടി വന്ന പൗലോസ് ഇങ്ങനെ പറയുന്നു “ക്രിസ്തുവിൽ ഞങ്ങളെ ഏപ്പോഴും ജയോത്സവമായി നടത്തുകയും എല്ലായിടത്തും ഞങ്ങളെക്കൊണ്ട് തന്റെ പരിജ്ഞാനത്തിന്റെ വാസന വെളിപ്പെടുത്തുകയും ചെയ്യുന്ന ദൈവത്തിന് സ്‌തോത്രം” (2കൊരി. 2:14).
നൊമ്പരങ്ങൾ വർദ്ധിപ്പിക്കുന്ന നിരവധി സാഹചര്യത്തിലൂടെ ഭക്തൻ കടന്നുപോയി. സകല വിധത്തിലും കഷ്ടം സഹിക്കേണ്ടി വന്നു. ബുദ്ധിമുട്ട് അനുഭവിക്കേണ്ടിവന്നു, ഉപദ്രവം സഹിക്കേണ്ടിവന്നു. ചിലപ്പോഴൊക്കെ താൻ വീണു പോയി എന്നാൽ “യേശുവിന്റെ ജീവൻ ഞങ്ങളുടെ ശരീരത്തിൽ വെളിപ്പെടേണ്ടതിന് യേശുവിന്റെ മരണം ശരീരത്തിൽ എപ്പോഴും വഹിക്കുന്നു” എന്ന് പറഞ്ഞ് പൗലോസ് അവയെല്ലാം അതിജീവിച്ചു (2കൊരി. 4:7-10).
ആശ്വാസ കാലങ്ങൾ എന്നത് സുഖകരമായ ആഡംബര കാലങ്ങളായി നാം തെറ്റിദ്ധരിക്കരുത്. മറിച്ച് പ്രശ്‌നങ്ങളുടെ മദ്ധ്യേ ദൈവ സാന്നിധ്യം അനുഭവിക്കുന്ന ദിവ്യസമാധാനത്തിന്റെ നാളുകൾ ആയിരിക്കും അത്. യേശുക്രിസ്തുവിന്റെ ഒന്നാം വരവ് കാത്തിരുന്ന ഭക്തന്മാരായ യഹൂദന്മാർക്ക് ആശ്വാസത്തിന്റെ നാളുകളായി തീർന്നെങ്കിൽ ആശ്വാസകാലങ്ങൾക്കായി കാത്തിരിക്കുന്ന നമുക്ക് കർത്താവിന്റെ മാർവ്വിൽ നവോൻമേഷം ഏകുന്ന ആശ്വാസ കാലങ്ങൾ ലഭ്യമാകട്ടെ!
ഇവിടെ പറയുന്ന ആശ്വാസകലങ്ങൾ കൃത്യമായും പരിശുദ്ധാത്മാവിനെക്കുറിച്ചു പാറുന്ന ഉണർവിന്റെ കാലമാണ്. ആ ഉണർവിന്റെ കാലങ്ങൾ ആവർത്തിക്കപ്പെടട്ടെ.

സമർപ്പണ പ്രാർത്ഥന

ദിവ്യ ആശ്വാസത്തിന്റെ ഉറവിടമായ സ്വർഗ്ഗസ്ഥനായ പിതാവേ, ഞങ്ങൾ ഇന്ന് അനുഭവിക്കുന്ന നൊമ്പരങ്ങളെ അതിജീവിപ്പാൻ അവിടുന്ന് ഞങ്ങളെ ആശ്വസിപ്പിക്കേണമേ! ഞങ്ങളുടെ പാപങ്ങൾ ക്ഷമിക്കേണമേ. തിരുസന്നിധിയിലേക്ക് മടങ്ങിവരികയും അങ്ങേക്കായി ഞങ്ങളെ സമർപ്പിക്കുകയും ചെയ്യുന്നു. ആശ്വാസകലങ്ങൾ ഞങ്ങളിൽ ആവർത്തിക്കണമേ, ആമേൻ.

റീചാർജ് ടുഡേ-2

ഭയത്തെ പുറത്താക്കുന്ന ദൈവ സാന്നിധ്യം 

പാസ്റ്റർ വി.പി. ഫിലിപ്പ് 

വായനാഭാഗം: യെശയ്യാവ്‌ :41

ധ്യാനവാക്യം: യെശ. 41: 10 'നീ ഭയപ്പെടേണ്ട, ഞാൻ നിന്നോടുകൂടെയുണ്ട്; ഭ്രമിച്ചുനോക്കേണ്ട, ഞാൻ നിന്റെ ദൈവമാകുന്നു. ഞാൻ നിന്നെ ശക്തീകരിക്കും; ഞാൻ നിന്നെ സഹായിക്കും; എന്റെ നീതിയുള്ള വലങ്കൈകൊണ്ടു ഞാൻ നിന്നെ താങ്ങും'.

യോഹന്നാൻ 3: 16- കഴിഞ്ഞാൽ ബൈബിളിൽ ഞാൻ ഏറ്റവും ഇഷ്ടപ്പെടുന്ന വാക്യമാണിത്. ജീവിതത്തിന്റെ പ്രതിസന്ധികളിൽ എന്നെ ഏറ്റവും ശക്തീകരിച്ച വാക്യവും ഇതുതന്നെ. പ്രത്യേകിച്ചും, 'അണയാത്ത അഗ്‌നിജ്വാല' എന്ന പുസ്തകത്തിന്റെ രചനാവേളയിലാണ് ദൈവം ഈ വാക്യത്തിലൂടെ എന്നോടു സംസാരിച്ചത്. പരിശുദ്ധാത്മാവിന്റെ പഠനവും ഉണർവ് ചരിത്രവുമാണ് പുസ്തകത്തിന്റെ ഉള്ളടക്കം. ദൈവശബ്ദംകേട്ട് പുസ്തകരചന ആരംഭിച്ചു. രചനയുടെ അവസാനദിവസങ്ങളിൽ ഞാൻ ന്യൂമോണിയ ബാധിതനായി രണ്ടുപ്രാവശ്യം ആശുപത്രിയിൽ അഡ്മിറ്റായി. എഴുത്തിലോ എഡിറ്റിംഗിലോ എനിക്ക് ശ്രദ്ധിക്കുവാൻ കഴിയാതെയായി. ഇരുന്ന് എഴുതുവാനും കഴിയുന്നില്ല.

വേദനിച്ച ഒരു രാത്രി ദൈവം എന്നോട് ഈ വാക്യത്തിലൂടെ സംസാരിച്ചു; 'നീ ഭയപ്പെടേണ്ട ഞാൻ നിന്നോടുകൂടെയുണ്ട്... എന്റെ നീതിയുള്ള വലങ്കൈകൊണ്ടു ഞാൻ നിന്നെ താങ്ങും'. ഞാൻ എഴുന്നേറ്റു. ഈ വാക്യം ഒരു വെള്ളപ്പേപ്പറിൽ എഴുതി എന്റെ മുറിയുടെ ഭിത്തിയിൽ ഒട്ടിച്ചു. എല്ലാദിവസവും രാവിലെയും ഉച്ചയ്ക്കും വൈകിട്ടും ഈ വാക്യം ഉരുവിട്ടു. അതെ, ദൈവം എന്നെ ശക്തീകരിച്ചു. എന്റെ രചന ദിവസങ്ങൾകൊണ്ട് പൂർത്തിയാക്കി. ദൈവകൃപയാൽ ആ പുസ്തകത്തിന്റെ മൂന്നാം പതിപ്പ് ഇപ്പോൾ പുറത്തിറങ്ങി. 

ഈ വാക്യം നിങ്ങൾക്കും ഒരു അനുഗ്രഹമായിത്തീരട്ടെ. ഓരോദിവസവും ഒന്ന് എന്ന ക്രമത്തിൽ ഒരു വർഷത്തേക്ക് 'ഭയപ്പെടേണ്ട' എന്ന സന്ദേശം വേദപുസ്തകത്തിൽ രേഖപ്പെടുത്തിയിരിക്കുന്നു.

 മനുഷ്യന്റെ ഏഴുവിധ പ്രശ്‌നങ്ങളോടുള്ള മറുപടിയാണ് ഈ വാക്യം.

1. ഭയപ്പെടുന്നവരോട് (നീ ഭയപ്പെടേണ്ട)
2. എനിക്ക് ആരുമില്ല എന്നു പറയുന്നവരോട് (ഞാൻ നിന്നോടുകൂടെയുണ്ട്)
3. ഭ്രമിക്കുന്നവരോട് (ഭ്രമിച്ചുനോക്കേണ്ട)
4. ദൈവമേ, നീ ഇതു കാണുന്നില്ലേ, നീ എവിടെ? എന്നു ചോദിക്കുന്നവരോട് (ഞാൻ നിന്റെ ദൈവം ആകുന്നു).
5. ഞാൻ ക്ഷീണിതനാണ് എന്നു പറയുന്നവരോട് (ഞാൻ നിന്നെ ശക്തീകരിക്കും)
6. എന്നെ സഹായിപ്പാൻ ആരുമില്ല എന്നു പറയുന്നവരോട് (ഞാൻ നിന്നെ സഹായിക്കും).
7. എല്ലാവരും എന്നെ കൈവിട്ടു എന്നു പറയുന്നവരോട് (എന്റെ നീതിയുള്ള വലങ്കൈകൊണ്ട് ഞാൻ നിന്നെ താങ്ങും).

പ്രിയരെ, ഓരോ ദിവസങ്ങളിലും ഈ വാക്യം നമ്മെ ശക്തീകരിക്കട്ടെ. ദൈവത്തിന്റെ സാന്നിധ്യം ഭയത്തെ പുറത്താക്കുന്നു എന്ന് അറിയുക. നമ്മുടെ ഭവനങ്ങളിലും ആ ദൈവ സാന്നിധ്യം നിറയപ്പെടട്ടെ. ബില്ലി ഗ്രഹാം പറഞ്ഞതുപോലെ “നമ്മുടെ ഭവനങ്ങൾ ആതിഥ്യമരുളുന്ന ഇടങ്ങളായിരിക്കണമെന്നും, നമ്മുടെ ഭവനത്തിലേക്ക് കടന്നുവരുകയും അവിടെനിന്ന് പുറത്തേക്കുപോകുകയും ചെയ്യുന്ന ഓരോരുത്തരും ക്രിസ്തുവിന്റെ സാന്നിധ്യം അനുഭവിക്കണമെന്നും ബൈബിൾ നമ്മെ പഠിപ്പിക്കുന്നു.”

സമർപ്പണപ്രാർത്ഥന: 'സൃഷ്ടാവാം ദൈവമേ, അങ്ങ് എന്നെ ധൈര്യപ്പെടുത്തുകയും ശക്തീകരിക്കുകയും ചെയ്യുന്നതിനു ഞാൻ നന്ദി പറയുന്നു. അങ്ങയുടെ നീതിയുള്ള വലങ്കൈകൊണ്ട് എന്നെ താങ്ങിയിരിക്കയാൽ സ്‌തോത്രം. എന്നും അങ്ങയോട് നന്ദിയുള്ളവരായി ജീവിക്കുവാൻ എന്നെ സമർപ്പിക്കുന്നു. ആമേൻ.'

റീചാർജ്ജ് ടുഡേ 1

മടങ്ങുക; അപ്പന്റെ വീട്ടിലേക്ക് 

ഡോ. വി. പി. ഫിലിപ്പ് 

ധ്യാന ഭാഗം: ലൂക്കോസ് 15:17,18

"അപ്പോൾ സുബോധം വന്നിട്ടു അവൻ: എന്റെ അപ്പന്റെ എത്ര കൂലിക്കാർ ഭക്ഷണം കഴിച്ചു ശേഷിപ്പിക്കുന്നു; ഞാനോ വിശപ്പുകൊണ്ടു നശിച്ചുപോകുന്നു. 

ഞാൻ എഴുന്നേറ്റു അപ്പന്റെ അടുക്കൽ ചെന്നു അവനോടു: അപ്പാ, ഞാൻ സ്വർഗ്ഗത്തോടും നിന്നോടും പാപം ചെയ്തിരിക്കുന്നു."

ലൂക്കോസ് 15 ലെ 3 ഉപമകളിൽ ഏറ്റവും അധികം വിശദീകരിക്കുന്ന ഉപമ നഷ്ടപ്പെട്ടു പോയ മകന്റെ ഉപമയാണ്. ഒന്നാമത്തെ ഉപമ വിശദീകരിക്കുവാൻ നാലു വാക്യങ്ങളും രണ്ടാമത്തെ ഉപമ വിശദീകരിക്കുവാൻ 3 വാക്യങ്ങളും എടുക്കുമ്പോൾ, മൂന്നാത്തെ ഉപമ വിശദീകരിക്കുവാൻ 22 വാക്യങ്ങൾ എടുക്കുന്നു. യേശുവിന്റെ ഉപമകളിൽ ഏറ്റവും ദീർഘമായ ഉപമയാണിത്.

യേശു പറയുന്ന മൂന്നാമത്തെ ഉപമയിൽ വീട്ടിലെ ഇളയ മകൻ അവന് വരേണ്ടുന്ന വസ്തുവിലെ പങ്ക് അപ്പനോട് ചേദിക്കുന്നു. അക്കാലത്ത് ജീവിച്ചിരിക്കുന്ന അച്ഛനോട് മകൻ വസ്തു ചോദിക്കുന്നത് അപ്പൻ മരിച്ചതായി കണക്കാക്കുന്നതിനു തുല്ല്യമാണ്. എന്നാൽ ഈ അപ്പൻ അവൻ ചേദിച്ചത് കൊടുത്തു. ചോദിക്കുന്നതിലോ കൊടുക്കുന്നതിലോ തെറ്റില്ല. എന്നാൽ ഇളയ മകൻ അത് ഉപയോഗിച്ചതിൽ ഗുരുതരമായ തെറ്റുകൾ സംഭവിച്ചു.

അവന്റെ പങ്കുമായി വീട്ടിൽ നിന്നും അകലും തോറും പാപത്തിലേക്ക്, ശൂന്യതയിലേക്ക് അവൻ അകലുകയായിരുന്നു. സ്വർഗ്ഗസ്ഥ പിതാവാം ദൈവത്തിൽ നിന്ന് അകലുന്ന മനുഷ്യന്റെ പരാചയത്തിന്റെ ചിത്രമാണിത്. ദുർന്നടപ്പുകാരനായി ജീവിച്ച് വസ്തു നാനാവിധമാക്കിയ ഇളയമകൻ പന്നികളോടൊപ്പം വയർ നിറയ്ക്കുവാൻ ആഗ്രഹിക്കുകയാണ്.

ഒന്നാമത്തെ ഉപമയിലെ കാണാതെ പോയ ആടിന് തനിയെ മടങ്ങാൻ കഴികയില്ല. ഇടയൻ തേടിവന്നു. രണ്ടാമത്തെ ഉപമയിലെ ദ്രഹ്മയ്ക്ക് ഉടമസ്ഥതയുടെ അരികിലേക്ക് തനിയെ മടങ്ങുവാൻ കഴിയുകയില്ല. ഉടമസ്ഥ തേടി ചെന്നു. എന്നാൽ മൂന്നാമത്തെ ഉപമയിലെ നഷ്ടപ്പെട്ട മകന് തനിയെ വീട്ടിലേക്ക് മടങ്ങി ചെല്ലുവാൻ കഴിയും. അവന് ആവശ്യം സുബോധവും മാനസാന്തരവുമാണ്. സ്വന്തമായി ഒരു വീടുണ്ടെന്നും ആ വീട്ടിൽ ഒരപ്പനുണ്ടെന്നും മകന്റെ മടങ്ങിവരവിനായി ആ പിതാവ് കാത്തിരിക്കുന്നു എന്നു തിരിച്ചറിയുക. അപ്പന്റെ സ്‌നേഹം വലുതാണ്. അവർണ്ണനീയമാണ്, അപ്പൻ മകനെ കണ്ടു. മനസ്സലിഞ്ഞു, ഓടിചെന്നു, ചുംബിച്ചു. മനുഷ്യന്റെ മാനസാന്തരത്തോട് എന്നും ദൈവം പ്രതികരിക്കുന്നു.

അപ്പൻ മൂന്ന് കാര്യങ്ങൾ മകനുവേണ്ടി ചെയ്യുകയാണ്. 1. അങ്കിധരിപ്പിച്ചു. സ്വീകരണവും ആദരവും നൽകുകയാണ്. 2. കൈക്ക് മോതിരം ധരിപ്പിച്ചു. അംഗീകാരവും അധികാരവും നൽകുകയാണ്. ഇനി യാചകനുമല്ല നഷ്ടപ്പെട്ടവനുമല്ല. 3. കാലിൽ ചെരിപ്പിട്ടുകൊടുത്തു. പുത്രത്വത്തിലേക്കുളള യഥാ സ്ഥാപനത്തെ കുറിക്കുന്നു. യേശു കർത്താവിന്റെ അങ്കി അവനെ ക്രൂശിച്ചവർ കൈക്കലാക്കിയതും യേശുവിന്റെ കൈകാലുകളിൽ കാരിരുമ്പ് ആണി പച്ചമരകുരിശിനോട് ചേർത്ത് അടിച്ചതും നമ്മെ പുത്രൻമാരും പുത്രമാരും ആക്കുവാനാണെന്ന് ഇവിടെ ഓർക്കുക. അതാണ് ദൈവരാജ്യത്തിന്റെ സുവിശേഷം.

സമർപ്പണ നിയോഗം: മടങ്ങുക; അപ്പന്റെ ഭവനത്തിലേക്ക്, ഇന്നുതന്നെ.

പ്രാർത്ഥന: "സ്വർഗ്ഗസ്ഥനായ പിതാവേ, ഞാൻ മടങ്ങിവരുന്നു. എന്നിൽ നൽകിയ സുബോധത്തിനായി സ്തോത്രം, ആമേൻ"

Advertisement