ആത്മീയ ഉണര്വിന്റെ മൂന്നു നാളുകള്; ഐ.പി.സി യുകെ & അയർലണ്ട് റീജിയണ് കൺവൻഷന് ലിവർപൂൾ സാക്ഷ്യം വഹിക്കും
വാർത്ത: സിബി നിലമ്പൂർ, ബെൽഫാസ്റ്റ്
ലണ്ടൻ/ലിവർപൂൾ: ഇന്ത്യാ പെന്തെക്കോസ്ത് ദൈവസഭ (IPC) യുകെ & അയർലണ്ട് റീജിയന്റെ 19-ാമത് വാർഷിക കൺവൻഷൻ ഏപ്രിൽ 10 മുതൽ 12 വരെ ലിവർപൂളിൽ സെന്റ് ജോൺ ബോസ്കോ ആർട്സ് കോളേജിൽ (St. John Bosco Arts College, 61 Storrington Avenue, Liverpool, L11 9DQ) നടക്കും. ഐ.പി.സി ഷാലോം ലിവർപൂൾ സഭയുടെ ആതിഥേയത്വത്തിലാണ് ഈ വർഷത്തെ കൺവൻഷൻ സംഘടിപ്പിക്കുന്നത്.
റീജിയൻ പ്രസിഡന്റ് പാസ്റ്റർ ജേക്കബ് ജോർജ് കൺവൻഷൻ ഉദ്ഘാടനം ചെയ്യും. ഐ.പി.സി ജനറൽ ജോയിന്റ് സെക്രട്ടറി പാസ്റ്റർ തോമസ് ജോർജ് മുഖ്യ സന്ദേശം നൽകും. കേരള പി.വൈ.പി.എ പ്രസിഡന്റായ പാസ്റ്റർ ഷിബിൻ ജി. സാമുവൽ യുവജനങ്ങൾക്ക് പ്രത്യേക സന്ദേശം നൽകും. കൺവൻഷനിൽ റീജിയൻ ക്വയർ ആരാധന നയിക്കും. യുകെ, യൂറോപ്യന് രാജ്യങ്ങളില് നിന്നുള്ള വിശ്വാസികൾ കണ്വെന്ഷനുകളില് പങ്കെടുക്കും. യുകെയിലും അയർലണ്ടിലും മറ്റ് യുറോപ്യൻ രാജ്യങ്ങളിലുമുള്ള പെന്തെക്കോസ്തു സഭകളുടെ ആത്മീയ ഐക്യത്തിനും നവോത്ഥാനത്തിനും ഈ കൺവൻഷൻ വലിയ പ്രചോദനമാകുമെന്നു സംഘാടകർ അറിയിച്ചു.
റീജിയൻ വൈസ് പ്രസിഡന്റായ പാസ്റ്റർ വിൽസൺ ബേബി കൺവൻഷൻ കൺവീനറായി പ്രവർത്തിക്കുന്നു. റീജിയൻ ഭാരവാഹികളായ പാസ്റ്റർ ഡിഗോൾ ലൂയിസ് (സെക്രട്ടറി), പാസ്റ്റർ വിനോദ് ജോർജ് (ജോയിന്റ് സെക്രട്ടറി), ജോൺ മാത്യു (ട്രഷറർ), പാസ്റ്റർ പി.സി സേവ്യർ (അഡ്മിനിസ് ട്രെറ്റർ), തോമസ് മാത്യു (നോർത്ത് അയർലൻ്റ് കോ-ഓർഡിനേറ്റർ) എന്നിവരും, മറ്റ് കൗൺസിൽ അംഗങ്ങളും കൺവൻഷൻ്റെ ഒരുക്കങ്ങൾക്ക് നേതൃത്വം നൽകും.
Advertisement
