ഇനിയും സജീവമാകണം ഐക്യകൂട്ടായ്മകൾ

ഇനിയും സജീവമാകണം ഐക്യകൂട്ടായ്മകൾ

സജി മത്തായി കാതേട്ട്

കേരളത്തിലെ പെന്തെക്കോസ്തു സഭകളുടെ വളർച്ചയ്ക്കും ഉണർവിനും ത്വരിതവേഗം നൽകിയ ആത്മീയ മുന്നേറ്റമായിരുന്നു ഐക്യ കൺവൻഷനുകൾ.  ഒറ്റപ്പെട്ടു നിൽക്കേണ്ടവരല്ല ഒരുമിക്കേണ്ടവരാണ് നാം എന്ന ഗുഡ്ന്യൂസിൻ്റെ ആഹ്വാനം ഉൾക്കൊണ്ട് സാധാരണക്കാരായവരാൽ നയിക്കപ്പെട്ട ഒരു സ്പിരിച്വൽ മൂവ്മെൻറ് ആയിരുന്നു ഐക്യസുവിശേഷ യോഗങ്ങളും ഐക്യ ആത്മീയ സംഗമങ്ങളും. വിവിധ ഇടങ്ങളിൽ പ്രയർ സെല്ലുകളും പാസ്റ്റേഴ്സ് പ്രയർ ഫെലോഷിപ്പുകളും ഉണ്ടായി.

താഴെ തലത്തിൽ നിന്നും മുകൾ തട്ടിലേക്ക് പടർന്നു കയറിയ ഈ ആത്മീയ ഉണർവ് ഏറെയും ഗ്രാമങ്ങളിൽ നിന്നായിരുന്നു തുടക്കം. സാധാരണക്കാരായ വിശ്വാസികളും നേതൃനിരയിലല്ലാത്ത ശുശ്രൂഷകന്മാരും ആയിരുന്നു ഇവരിൽ ഏറെയും. പെന്തെക്കോസ്തു വിശ്വാസികളുടെ പൊതുമാധ്യമമായ ഗുഡ്ന്യൂസിന്റെ ഐക്യ ആഹ്വാനം വെറും പാഴ്വാക്കാണെന്ന് കരുതി അവഗണിച്ച നേതൃനിരയെ അത്ഭുതപ്പെടുത്തിയാണ് ഈ ഐക്യകാറ്റ് മലങ്കരയിൽ പടർന്നു പന്തലിച്ചത്. 

എല്ലാ പെന്തെക്കോസ്ത് സംഘടനയും  അവരവരുടെ ചട്ടക്കൂട്ടിൽ നിൽക്കുമ്പോൾ തന്നെ ഐക്യകൂട്ടായ്മകളിൽ സജീവമാകണമെന്ന ഗുഡ്ന്യൂസ് ആഹ്വാനം പല രീതികളിലും ചർച്ചചെയ്യപ്പെട്ടുവെങ്കിലും അതൊരു അനിവാര്യതയായി പെന്തെക്കോസ്തു സമൂഹം ഉൾക്കൊണ്ടു.

തിരുവനന്തപുരം ജില്ലയിലെ അതിർത്തി ഗ്രാമമായ വെള്ളറടയിൽ തുടങ്ങി കാസർകോടിലെ
നീലേശ്വരം വരെ കേരളത്തിൽ ഐക്യകൺവെൻഷനുകൾ നടത്തപ്പെട്ടു.  സംഘടന വേർതിരിവില്ലാതെ പ്രസംഗകരെ എത്തിച്ച്   ഗ്രാമാന്തരങ്ങളിൽ ക്രിസ്തുവിനെ ഉയർത്തിക്കാട്ടി.
കൂട്ടായ്മകൾക്കും കൺവെൻഷനുകൾക്കും വേണ്ടി ഒരുമിച്ചുള്ള ആലോചനകളും നോട്ടീസ് വിതരണവും ഭക്ഷണം പാകം ചെയ്യലും സ്റ്റേജ് ഒരുക്കലുമെല്ലാം ഐക്യതയുടെ ഊഷ്മളമായ ആഴം മനസ്സിലാക്കാനിടയായി.

ചെറിയ തുടക്കങ്ങൾ മധ്യകാലത്ത് ആരംഭിച്ചെങ്കിലും 1980കളിലാണ് ഐക്യ പ്രസ്ഥാനങ്ങൾ കേരളത്തിൽ  വ്യാപിച്ചത്.

ഐക്യക്രൂസേഡുകൾ, കെപിഎഫ് കൺവൻഷനുകൾ, പിന്നീട് യുപിഎഫ് കൺവൻഷനുകൾ
തുടങ്ങിയവ മലയാളക്കരയിൽ പെന്തെക്കോസ്ത് മുന്നേറ്റത്തിനും ഉണർവിനും നിദാനമായി. അമേരിക്കൻ ഐക്യനാടുകളിൽ പിസിഎൻഎകെ (പിസിനാക്ക്) യും വിവിധ സഭകളുടെ ഐക്യ സംരംഭങ്ങളും അതാതിടങ്ങളിലെ ഐക്യ യുവജന സംഘടനകളും സഭാവളർച്ചക്ക് നിദാനമായി. എല്ലാവരും ഒത്തൊരുമിച്ചുള്ള സുവിശേഷ പ്രവർത്തനങ്ങൾ ശ്രദ്ധേയവുമായി. സുവിശേഷ പ്രവർത്തനത്തിൽ മാത്രമൊതുങ്ങാതെ  ജീവകാരുണ്യ പ്രവർത്തനങ്ങളിലും സാമൂഹ്യ ക്ഷേമ ഇടപെടലുകളിലും ഐക്യ സംരംഭങ്ങൾ മുന്നിട്ടിറങ്ങിയതും സമൂഹത്തിൽ മതിപ്പുളവാക്കി.

സംഘടിതമായുള്ള സുവിശേഷ പ്രവർത്തനങ്ങളും മറ്റു പ്രവർത്തനങ്ങളും കൂട്ടായ്മകളും കൺവെൻഷനുകളും മൂലം പെന്തെക്കോസ്തു സമൂഹത്തിന്റെ ഒത്തൊരുമ മറ്റുള്ളവരുടെയിടയിൽ ഒരളവോളം മാതൃകയായി. 

ഇന്നും ശ്രദ്ധേയമായി പ്രവർത്തിക്കുന്ന ഐക്യ സംരംഭങ്ങളാണ് മല്ലപ്പള്ളി യുപിഎഫ്, തിരുവല്ല വെസ്റ്റ് യുപിഎഫ്,  കുന്നംകുളം യുപിഎഫ്, ചേലക്കര യുപിഎഫ്, നിരണം യുപിഎഫ്, കുണ്ടറ യുപിഎഫ്, ചങ്ങനാശ്ശേരി യുപിഎഫ് , കൊടുമൺ യുപിഎഫ്, വയനാട്, മാനന്തവാടി, സുൽത്താൻ ബത്തേരി യുപിഎഫുകൾ, മണ്ണാർകാട് പാസ്റ്റേഴ്സ് ഫെലോഷിപ്പുകൾ തുടങ്ങിയവ. നാടിൻ്റെ പെന്തെക്കോസ്ത് ചരിത്രരേഖകളായി മാറിയ ഇത്തരം  ആത്മീയ സംഘങ്ങൾ സഭാസംഘടന വ്യത്യാസമില്ലാതെ പ്രവർത്തിക്കുന്നതുമൂലം പുതിയ സഭകൾ ആരംഭിക്കുന്നതിനും സുവിശേഷ വ്യാപനത്തിനും കാരണമാകുന്നു. വള്ളുവനാടിൻ്റെ സാംസ്കാരിക ഭൂമികയായ  ഭാരതപ്പുഴയിൽ തുടങ്ങിയ ഭാരതപ്പുഴ കൺവൻഷനും ചരിത്രത്തിലിടം നേടി. 

'പൂർവീകതയിലേക്ക് ഒരു തിരിച്ചു വരവ് ' എന്ന ദൗത്യം ഏറ്റെടുത്ത് ഒരുമിച്ചു നിന്ന് പ്രവർത്തിക്കേണ്ട ഈ കാലങ്ങളിൽ ഐക്യ കൂട്ടായ്മകൾ വീണ്ടും സജീവമാകണമെന്നാണ്  കാലഘട്ടത്തിന്റെ  അനിവാര്യത സൂചിപ്പിക്കുന്നത്. മുകളിൽ പറഞ്ഞ കൺവെൻഷനുകളുടെ ആരംഭങ്ങൾക്ക് പിന്നിൽ അതാത് കാലത്ത് പ്രവർത്തിച്ചിരുന്ന ഗുഡ്ന്യൂസ് പ്രവർത്തകരായിരുന്നു എന്നത് നമുക്ക് പ്രചോദനമാകുന്നു.

കഴിഞ്ഞവർഷം പ്രവർത്തനമാരംഭിച്ച ലോകമെമ്പാടുമുള്ള പെന്തെക്കോസ്തു ഐക്യസംരംഭങ്ങളുടെ ഐക്യവേദികളുടെയും (യുപിഎഫുകൾ) പാസ്റ്റേഴ്സ് ഫെലോഷിപ്പുകളുടെയും ഐക്യവേദിയായ യുപിഎഫ് ഗ്ലോബൽ അലൈൻസ് എന്ന ആത്മീയസംഘടനയുടെ  പ്രവർത്തനം പെന്തെക്കോസ്തു ചരിത്രത്തിലെ നാഴികകല്ലാണ്.

Advt.