ഹാപ്പി ഫാദേഴ്‌സ് ഡേ

ഹാപ്പി ഫാദേഴ്‌സ് ഡേ

ഫാദേഴ്‌സ് ഡേ എന്നത് മക്കൾ  പിതാക്കന്മാരെ ഓർക്കാനും ബഹുമാനിക്കാനും മാത്രമുള്ളതല്ല, തലമുറകളോടുള്ള പിതാക്കന്മാരുടെ ഉത്തരവാദിത്തം ഓർമിപ്പിക്കാൻകൂടിയുള്ളതാണ്. വരും തലമുറയോട് ഓരോ പിതാവിനും അതുപോലെ മാതാവിനും   ഉത്തരവാദിത്തമുണ്ട്. വചനം അതാണ് പറയുന്നത്. 78-ാം സങ്കീർത്തനത്തിൽ സങ്കീർത്തനക്കാരൻ എഴുതി: 
"നാം അവയെ കേട്ടറിഞ്ഞിരിക്കുന്നു; നമ്മുടെ പിതാക്കന്മാർ നമ്മോടു പറഞ്ഞിരിക്കുന്നു.
നാം അവരുടെ മക്കളോടു അവയെ മറെച്ചുവെക്കാതെ വരുവാനുള്ള തലമുറയോടു യഹോവയുടെ സ്തുതിയും ബലവും അവൻ ചെയ്ത അത്ഭുതപ്രവൃത്തികളും വിവരിച്ചുപറയും.
അവൻ യാക്കോബിൽ ഒരു സാക്ഷ്യം സ്ഥാപിച്ചു; യിസ്രായേലിൽ ഒരു ന്യായപ്രമാണം നിയമിച്ചു; നമ്മുടെ പിതാക്കന്മാരോടു അവയെ തങ്ങളുടെ മക്കളെ അറിയിപ്പാൻ കല്പിച്ചു. വരുവാനുള്ള തലമുറ, ജനിപ്പാനിരിക്കുന്ന മക്കൾ തന്നേ, അവയെ ഗ്രഹിച്ചു എഴുന്നേറ്റു തങ്ങളുടെ മക്കളോടറിയിക്കയും അവർ തങ്ങളുടെ ആശ്രയം ദൈവത്തിൽ വെക്കുകയും ദൈവത്തിന്റെ പ്രവൃത്തികളെ മറന്നുകളയാതെ അവന്റെ കല്പനകളെ പ്രമാണിച്ചുനടക്കയും 
തങ്ങളുടെ പിതാക്കന്മാരെപോലെ ശാഠ്യവും മത്സരവും ഉള്ള തലമുറയായി ഹൃദയത്തെ സ്ഥിരമാക്കാതെ ദൈവത്തോടു അവിശ്വസ്തമനസ്സുള്ളോരു തലമുറയായി തീരാതിരിക്കയും ചെയ്യേണ്ടതിന്നു തന്നേ." (വാക്യം 4 മുതൽ 8 വരെ  ).

കർത്താവിന്റെ സ്തുതികളും പ്രവൃത്തികളും വചനവും വരാനിരിക്കുന്ന തലമുറയുമായി പങ്കുവയ്ക്കേണ്ടത് എന്തുകൊണ്ട്? അതാണ്  7-ാം വാക്യം നമ്മോട് പറയുന്നത് : "അവർ ദൈവത്തിൽ പ്രത്യാശ വെക്കുകയും ദൈവത്തിന്റെ പ്രവൃത്തികളെ മറക്കാതെ അവന്റെ കല്പനകൾ പാലിക്കുകയും വേണം." അവ ഓരോന്നും അവർ ദൈവത്തിൽ പ്രത്യാശ വെക്കാൻ വേണ്ടി  അവരെ ഭാവിയിലേക്ക് ഒരുക്കിയെടുക്കാനുള്ള ദൈവിക നിർദ്ദേശങ്ങളാണ്. കാരണം പ്രത്യാശയുള്ള ഒരു  ഭാവിയിലേക്ക് നോക്കുവാൻ അവ പിതാക്കന്മാരെയും മക്കളെയും ഒരുപോലെ സഹായിക്കുന്നു. മരിച്ചവരിൽ നിന്നുള്ള യേശുക്രിസ്തുവിന്റെ പുനരുത്ഥാനത്താൽ വിശ്വാസികൾ  ജീവനുള്ള പ്രത്യാശയിലേക്ക് വീണ്ടും ജനിക്കുന്നു. 

നമ്മുടെ കർത്താവ് വരുമെന്നും ഒരു ദിവസം ഞങ്ങളെ വീട്ടിലേക്ക് കൊണ്ടുപോകുമെന്നും അറിയാവുന്ന അനുഗ്രഹീതമായ പ്രത്യാശ അവർക്കുണ്ട്. എന്നാൽ പുതിയ  തലമുറയിലെ  ആളുകളിൽ പലരും പണത്തിലോ സർക്കാരിലോ വിദ്യാഭ്യാസത്തിലൊ സ്വന്തം അനുഭവത്തിലോ തങ്ങളുടെ പ്രതീക്ഷകൾ വയ്ക്കുന്നു. അതോടൊപ്പം അവർ ദൈവത്തിൽ  പ്രത്യാശ വയ്ക്കണമെന്ന്   അവരെ പഠിപ്പിക്കേണ്ടത് പിതാക്കന്മാരുടെ ഉത്തരവാദിത്തമാണ്.

മറ്റൊന്ന്, അടുത്ത തലമുറ ദൈവത്തിന്റെ പ്രവൃത്തികൾ ഓർക്കണമെന്ന് നമ്മൾ  ആഗ്രഹിക്കണം. അത് ഭൂതകാലവുമായി ബന്ധപ്പെട്ടിരിക്കുന്നു.  ദൈവം നമുക്കുവേണ്ടി ചെയ്‌തത്‌ മറന്നുകളയാൻ വളരെ എളുപ്പമാണ്‌! എന്നാൽ, വരും തലമുറയെ അവ ഓർമ്മിപ്പിച്ചുകൊണ്ടിരുന്നാൽ , അവർ കർത്താവിന്റെ പ്രവൃത്തികൾ ഓർക്കും. ഭൂതകാലം മറക്കാൻ പാടില്ല. ഭൂതകാലം മറക്കുന്നവർ ദുരന്തങ്ങൾ  ആവർത്തിക്കാൻ വിധിക്കപ്പെട്ടവരാണ്. മുമ്പത്തെ മീറ്റിംഗിന്റെ മിനിറ്റ്സ് വായിക്കാത്ത ആളുകളാണ് പലപ്പോഴും ഏറ്റവും മോശമായരീതിയിൽ പ്രശ്നങ്ങൾ ഉണ്ടാക്കുന്നതെന്ന് നമ്മൾ കേട്ടിട്ടുള്ളവരാണല്ലോ!

അവസാനമായി, യുവതലമുറ ദൈവ കൽപ്പനകൾ പാലിക്കുന്നതിനായി നാം ദൈവികകാര്യങ്ങൾ അവരുമായി പങ്കുവെക്കണം. അത് ഇപ്പോൾ, വർത്തമാനകാലത്ത്. സങ്കീർത്തനക്കാരൻ ഇവിടെ പറഞ്ഞിരിക്കുന്നത് ഒരു നിയമപരമായ ജീവിതത്തെക്കുറിച്ചല്ല. കർത്താവിനോടുള്ള സ്‌നേഹപൂർവകമായ അനുസരണത്തെക്കുറിച്ചാണ്. അതെ, നമുക്കെല്ലാവർക്കും  പുതിയ തലമുറയോട് ഒരു ഉത്തരവാദിത്തമുണ്ട്, ഒരു നല്ല മാതൃകയായി, പഠിപ്പിച്ചും, പങ്കുവെച്ചും, പ്രോത്സാഹിപ്പിച്ചും ആ ഉത്തരവാദിത്തം നമ്മൾ നിറവേറ്റണമെന്നു കർത്താവു ആഗ്രഹിക്കുന്നു. കർത്താവിനെ, ദൈവവചനത്തെ  അനുസരിക്കാൻ വരും തലമുറയെ നമുക്ക് പ്രോത്സാഹിപ്പിക്കാം. ഈ ഫാദേഴ്‌സ് ഡേ ഓരോ പിതാവിനും (മാതാവിനും) അതിനുള്ള അവസരമായി  തീരട്ടെ എന്ന് ആശംസിക്കുന്നു.

Advertisement

Advertisement